Shillong, Rymphang 16: U Lat ka jylla Meghalaya, u CH Vijayashankar, ula pdiang burom ia u Sadguru Sri Madhusudan Sai, u nongialam niam bad uba leh ia ki kam synei ia ki briew uba la pawnam ha kylleng satlak ka pyrthei ha ka jingwan ha Raj Bhavan, Shillong hynne ka sngi u Blei.
Ha kane ka jingiakynduh u Lat ka jylla ula pynpaw ia ka jingsngewnguh ia u Sadguru Sri Madhusudan Sai halor ka jingnoh synniang kaba khraw ka jongu sha ka imlang sahlang khamtam eh ha ka liang ka pule puthi, ka koit ka khiah bad halor ka bam kaba tei, kaba la kyntiew ia ki mynsiem briew ha kylleng jong ka ri India.
U Lat ula pynpaw ruh ia ka jingsngewtynnad halor ka jingia treilang hapdeng u Sadguru bad ka sorkar Assam ban sdang ia ka Morning Nutrition Programme, ban sam ei ia ki jingbam kiba tei sha ki khynnah kiba leit skul. Kane ka jingthmu kala ai jingmyntoi ia ki lak ngut kaba pyni ruh iaka jingskhem jingmut ha kaban noh synniang na ka bynta ka bha ka miat jong ki paidbah.
Haba ai jingkren, u Sadguru Sri Madhusudan Sai ula banjur iaka jingkongsan jong ka “Vasudhaiva Kutumbakam” (Kawei ka Pyrthei, Kawei ka Longiing) bad ula kyntu ia baroh ba kidei ban don ia ka mynsiem ban shakri bad ba don ia ka jingsngewlem.
Ki jinghikai bad ki kam lehbha ki jongu kila bteng ha kaban ai mynsiem ia ki riewshimet kiba trei na ka bynta ka bha ka miat jong ka imlang sahlang.
U Sadguru ula iakynduh ruh ia u Vijay Kumar Mantri u Commissioner and Secretary ka tnad pule puthi ha kaba kila iakren ban sdang noh ia kaj ingsam ei ia ki jingbam kiba tei ia kumba 10,000 ngut ki khynah skul ha ka jylla Meghalaya.
U Sadguru ula iaroh ruh ia ka jylla Meghalaya ia ka jingitynnad ia ki jaka bad ka mariang ka jongka bad ka jingdon ia ki kynbat bad u don ia ka jingthmu ban noh synniang ha kaba iadei bad ka liang jong ka koit ka khiah ruh.
Ha kane ka sngi la pynlong ruh ia ka prokram kaba iadei bad ka kolshor ha Raj Bhavan, ia kaba la pynbyrngia da ka Geetanjali Dance Academy.
U Lat ka jylla ula pynpaw ia kajingsngewnguh ia u Sadguru Sri Madhusudan Sai halor ka jingnoh synniang kaba khraw ka jongu bad kumjuh ia ka jingwan jngoh ia ka jylla Meghalaya, kaban long kaei kaei kaban iai sah kynmaw ha ka liang ka niam bad ka jingai mynsiem ban trei na ka bynta ka imlang sahlang.
