Shillong, Naitung 29: Ki nong Bangladesh kila wan kiew da ki phew tylli ki lieng shaduh u pud ka India hajan ka shnong Dangar, East Khasi Hills, ban khlong maw napoh ka wah Umngi.
Kane ka jingwan khlong maw ki BSF na India ka dei kaba ju jia manla ka por ha ki jaka khappud ka Jylla khamtam ha ki thain Balat, Dangar, Dawki, Hat Thymmai bad kiwei kiwei ki jaka.
Ka seng Khasi Students Union South West Khasi Hills bad ka KSU Balat Border Area, kala pynpaw ia ka jingsngewkhia kaba jur halor kane ka jingjia ha khappud bad kynnoh ba dei ki shipai Border Security Force kiba don ha Dangar Border Outpost, kiba pyllait lan bad ailad ia kine kiei kiei ba kin jia.
Ka KSU kala kynnoh ruh ba lehse ia kane ka kam la leh da ka jingiasngewthuh jingmut lang hapdeng ki shipai BSF bad ki nong Bangladesh-kaba buh pat ha ka jingma ia ka Jaidbynriew lada ym shimkhia noh mardor ban tehlakam namar khlem pep kan sa pyniajan ia ka jingiadei bad pynioh suk ia kine ki bym dei ki nong India ban pynlong ia kiktem shipai kum ki jaka rung sha India bad leit buhai shnong ha kylleng ki jaka hapoh u pud u sam ka Bri u Hynniewtrep.
Ka KSU kala dawa ia ki bor District ka East Khasi Hills ba kin tuklar mardor ia kane ka kam lem kumta ka seng kam banse ban hiar hi dalade sha ka thain ban leh eiei dalade.
