Nongpoh, Rymphang 27: Ki bahaiing hasem na Assam, kila wan ban shimti noh ia ka metiap ba sah jong ki hynriew ngut ki riewniam kiba khlad hashen na ka jingjia aksiden kali, kaba jia hynnin ka sngi U Blei ha Sumer Umbang.
Ia kine ki metiap la aiti hadien ka Post mortem ha Civil Hospital, Nongpoh bad ia kine ki bahaiing hasem la wan synran lang da ki Sister bad ki Phadar na ka Balang Catholic.
Kitei ki 6 ngut kiba la khlad noh ki kynthup ia u Rev. Fr. Mathew Das, Parish Priest jong ka Barama Parish, ka Sr. Milagrine Dantas, ka Sr. Pramila Turkey, ka Sr. Rosy Nongrum kiba dei ki sisters jong ka Fatima Convent, u Myrone Ranger u ba dei u nonghikai ka St. John Higher Secondary School jong ka Barama bad u Sanjay Swargiary u ba dei i nongñiah jong ka Bolero.
Ïa ka met jong kitei ki riew niam kiba kynthup ïa u Rev. Fr. Mathew Das bad ki 3 ngut ki sisters yn pyndep ia ka jinglehniam kaba khatduh ha Christ The Light of the World Cathedral Church Bongaingaon naduh ka por 3 baje janmiet bad ka jingleit ontep ia ki kan long ka St. Jude Prayers Tower, Kajalgoan.
Na ka liang u Fr. Peter Syiemlieh Parish Priest jong ka Balang Catholic Nongpoh Parish, u la pynpaw ia ka jingsngewsih kaba khraw bad kaba la long ruh ka jingduhnong kaba khraw ia ki paid riewngeit jong ka Balang Catholic ha kaba la jia tang namar ka jingjia aksiden kaba shyrkhei.
U la pynpaw ruh, ia ka jingsngewnguh ia baroh ki riew paidbah kiba la shimkhia ban ai jingïarap naduh hynnin ka sngi haduh mynne janmiet tad haduh ban ïoh shimti noh ia ki met ïap jong kitei ki riewngeit, kumjuh ruh ia ki Father, Sister kiba la ïawan ban ai mynsiem, ki Doctor, ki Nurse, ki bor pulit kiba la trei shitom ban pyndep ia ka kam ha ka por kaba biang bad kumjuh ruh ia ki paidbah jong ka thain Nongpoh kiba la ia wan ban ia ai mynsiem ha kum kane ka por kaba sngewsih.
Kum u Parish Priest, u la phah ruh ia ka khubor sngewlem sha baroh ki bahaïing hasem bad kiba ïeid ba thoiñ jong kitei 6 ngut kiba la khlad noh bad u la ai mynsiem ba u Blei un don ryngkat bad ki ha kum kane ka por kaba sngewsih kthang bad u Blei un ai ka jingjahthaid ka bym jukut ia ki 6 ngut ki riewngeit jong ka Balang Catholic.
