Imphal, Naitung 25 : Kumba 718 ngut ki nong Myanmar kynthup ia 301 ngut ki Khynnah bad 208 ngut ki Kynthei kila rung sha Chandel District ka Manipur namar ka jingbteng ki jingiakynad bad ki shipai ha Myanmar, ong ki Heh Sorkar ha ka miet sngi Nyngkong.
Ka Sorkar Manipur kala bthah ia ka Assam Rifles ba kin pynphai biang ia kine ki nong Myanmar shala ka jong ka Ri.
U Chief Secretary ka Manipur Vineet Joshi ha ka kyrwoh ula ong ba ka Sorkar kala kan ia ka jingtip kaba bniah na ki bor khmih ka Assam Rfiles halor ki daw ba la ailad ia kine ki 718 ngut ki nong Myanmar ba kin wan rung sha Chandel District khlem kino kino ki kot ki sla kiba biang.
Ka Sorkar Jylla kala ai ka jingbthah ba tyngeh ia ki Assam Rifles ba kin khynniat biang noh mar mar ia kine ki 718 ngut ki nong Myanmar ba wan rung beain, ong u Chief Secretary.
Ula pyntip ba kine ki nong Myanmar kila wan rung sha Manipur naduh ka sngi Saitjain bad sngi u Blei bad mynta kila sah ha ki hynniew tylli ki jaka ka Chandel District ba kynthup ia ka Lajang, Bonse, New Samtal, New Lajang, Yangnomphai, Yangnomphai Saw Mill, Aivomjang, kiba don baroh ha khappud ka Myanmar.
U Chief Secretary ula bthah ia u Deputy Commissioner bad ia u Superintendent of Police ka Chandel District ba kin leh eiei noh mardor halor kane ka kam bad ruh ban buh jingthoh ia ki jingtip ba bniah nalor ki dur jong kine ki briew.
Lah ban kdew ba naduh ba knieh ki shipai ia ka jingsynshar ha Myanmar ha u Rymphang 2021, da ki hajar ngut ki nong Myanmar kila phet sha Mizoram bad kumba 35000 ngut ki shynrang, kynthei bad khynnah na kane ka ri kila sah sha ki jaka lum jong ka Jylla.
Kumba 5000 ngut ki nong Myanmar kila shong riehtngen ha Manipur.
