Ka Tura ka dei ban shim kabu ban jied ia u CM
Tura, Rymphang 12 : U Myntri Rangbah ka Jylla Conrad K Sangma ula iaid kyntu ia ki paidbah hala ka Constituency ba ki Nongthep vote ka Tura ki dei ban shim kabu ia ka lyer jong ka NPP bad ban kyrshan ia ki kyrtong namar ka lyer ka jur bha mynta haduh ba wat ki MLA na ki Liang Pyrshah kila sngewthuh ia ki jingduhnong ba kin shah ieh shadien bad kila wan ban pyniasoh ban iakhun ia ka elekshon na ka ticket ka NPP.
“Ki MLA ka Liang Pyrshah kila iohi ba ka mon u paidbah ka noh bha sha ngi, lem kumta balei ba kito ki MLA na ka Trinamool bad ka Congress nalor ki seng riewlum kin wan ban pyniasoh sha nga” buh jingkylli u Myntri Rangbah ka Jylla.
“U Jimmy D Sangma bad Marthon J Sangma na ka Trinamool Congress, Ampareen Lyngdoh, Mohindro Rapsang bad Kimfa Marbaniang na ka Congress, Hamletson Dohling, Samlin Malniang bad kiwei kila wan rung sha ngi namar ki tip ba ka NPP kan thaw ia ka Sorkar kaba skhem bad kaba tam ia ka jingdonkam paid” ong u Conrad haba bynrap ba ki Liang Pyrshah hi kin ioh tang hapoh 9 seat ynda la niew ia ki vote la 2tarik Lber.
“Ki Nongthep Vote ka Tura kin ym thep vote tang ia u Conrad Sangma marwei hynrei ia u Myntri Rangbah ka Jylla bad ki vote jong phi kan ktah bha ia ka Jylla baroh kawei bad ka pynmyntoi ia kiwei. Peit ia ka Rongjeng, phi vote ia nga san snem mynshwa, phi iarap ia nga ban iatreilang bad ki paidbah ka Rongjeng ban pynurlong ia ka Civil Sub Division. Ka vote jong phi kan pynmyntoi bha ia kiba bun” ong u Myntri Rangbah hapdeng ka jingrisa ki nongthep vote ha ka jingialap elekshon hynne ka janmiet sngi U Blei ha Iew Tura.
U Conrad ula kren ruh halor ka jingkongsan jong ka Sor Tura kaba la shah iehbein ha ka roi ka par la bun tylli ki snem, ula ong “Tang ha kine ki san snem, ngi la lah ban pynkylla bad ngi la lah ban tehlakam ia ka jingkyrduh um, ki strretlight, ki surok shnong bad ki madan ialehkai na ka bynta ki samla”.
Halor ka jingkhanglad ban wanphai biang ki kai kaikhlaw bad ki jingjia umsnem ha ki snem bala leit noh, u Myntri Rangbah ula ong ba ka Sorkar jong u kala trei khlem shongthait ban pynthikna ba ka jingshongsuk kan don hakhmat eh ha ka synshar khaddar.
Ula pynkynmaw ruh ia ki jingkynthoh kiba antad ba ka Jylla kan nym lait na ki kam kaikhlaw hynrei ka Sorkar jong u kala pyni ba ki bakla.
“Ki bor syntiat jong ngi ki iai peitngpor beit-bun kim tip ba kumno ka sorkar ka treikam ha ryngkat bad ki Pulit. Hadien ki jingjia bthei bomb ha Shillong, ki Pulit kila trei khlem shongthait ban kila lahban tehlakam ia ki jingjia bthei bomb kiba shyrkhei kiba lahban jia ha ki sngi badki taiew ban wan” ong u Myntri Rangbah haba iaroh ia ka jingtreikam jong ki bor ka Ain ban khanglad ia ki kam kaikhlaw ba kin mih biang bad ka jinglah ban tehlakam ia ki kam dawa pisa jubor.
“Ka jingtieng jingsyier kaba don ha ka jingmut jingpyrkhat jong ki nongshongshnong kam don shuh mynta” ong u Conrad.
