Shillong, Rymphang 05 : Arngut ki Nongialam ka Mahila Congress ka Shillong City-Kong Niloufer Laloo bad kong Meba Kharkongor, kila leit pyniasoh ialade sha ka National People’s Party (NPP) ban kyrshan ia u kyrtong Bah Ransom Sutnga ha kane ka elekshon MLA-2023.
Kine ki arngut ki Longkmie kila pyniasoh hynnin ka sngi saitjain bad la pdiang burom ia ki da u Nongialam ka NPP Dr Don War bad Kong Eldora Lyngdoh, President ka NPP Womens Wing ka North Shillong, ha ka jingialang duwai bala pynlong ha Khasi National Dorbar Hall, Mawkhar.
Hadien ba la dep pdiang ia ki sha ka Iing jong ka NPP, kine ki arngut kila leit ban synran ia u kyrtong ha ka jingleit thep kyrteng hakhmat u Returning Officer, ha ophis u Deputy Commissioner.
“Kan nang iarap ia nga ban ioh ia ka jingjop” ong u Bah Ransom halor ka jingwan pyniasoh kine ki arngut ki Nongialam ka Congress.
Ka North Shillong Constituency kan sakhi ia ka jingiakhun jongki 8 ngut ki kyrtong ha kane ka elekshon ban wan.
U Bah Ramsom ula pynpaw ia ka jingsngewskhem ba kan don ka jingiakhun kaba itynnad bha.
Lah ban kdew ba kiwei pat ki kyrtong ki dei u MLA Bah Edelbert Nongrum u ban iakhun na ka VPP, u DHS barim Dr Aman War u ban iakhun na ka UDP, Bah MH Kharkrang, IPS u ban iakhun na ka BJP, Bah JA Lyngdoh MLA barim ka Nongspung ban iakhun n aka Congress bad kiwei kiwei.
