Hailakandi, Nohprah 12 : Haduh 1179 ngut ki dkhot jong ki artylli ki kynhun seng lehnoh Reang, kata ka Bru Liberation Army Union (BLAU) bad ka United Democratic Liberation Army (UDLA) kila wan pyndem noh ia ki tiar ialeh jong ki mynta ka sngi ha ka jingialang kaba la long ha Hailakandi district ka Assam.
Kine ki artylli ki kynhun kieng atiar ki dei kiba treikam ha ki bynta jong ka Cachar, Karimganj bad Hailakandi district ha ka thain shathie ka Assam.
Iakine ki lehnoh kila wan pynwait noh ha ka jingialang kaba la long ha ka madan ialehkai jong ka Charlmers Memorial Higher Secondary School ha Katlicherra.Ha kane ka jingialang la ia don lang ruh u Lamphang ka iingdorbar thawain ka jylla u Biswajit Daimary bad u Myntri ka sorkar Assam u Pijush Hazarika.
Nalor kata kine ki lehnoh kila pyndem noh ruh ia kumba 335 tylli ki tiar ialeh abd kumba 382 tylli ki kuli.
Na ka liang ki Superintendent of Police jong ka Hailakandi, Cachar, bad Karimganj district kham hashwa kila buh ka jingkyrpad na ka bynta ban pyni paidbah ia kine ki tiar ialeh ba la wan pyndem da kine ki dkhot jong kine ki artylli ki kynhun seng lehnoh ha kane ka jingialang.
Ka sorkar pdeng bad ki sorkar ka jylla Mizoram bad Tripura kumjuh ka kynhun Mizoram Bru Displaced People’s Forum (MBDPF) kila poi sha ka jingiamynjur ha u snem 2018 ha kaba iadei bad ka jingpynphai pat ia ki longiing kiba dei na ki jaidbynriew Bru bad kila sdang ruh ban pynlong ia ki jingiakren bad ki kynhun seng kieng atiar ba kin wanphai pat sha ka lynti kaba dei.
Na ka ling ki bor pulit kila ong ba baroh kitei ki artylli ki kynhun kieng atiar ki dei kiba treikam bha ha ki snem 1990 ha ki jaka khappud ka Assam bad Mizoram, khamtam hapoh Hailakandi district.
Kine ki kynhun la kynnoh ruh ba ki dei kiba donkti halor ka jingshah pyniap jong u nongialam ka BJP u Pratul Deb uba la wanphai sha India na London hadien ka jingshongthait noh kumjuh halor ki kam dawa pisa jubor, ki kam rahbor bad kiwei pat ki kam pyntriem.
