Shillong, Naiwieng 11: Kum ka dak jong ka jingrakhe iaka jingdap 75 snem jong ka jingioh ka ri iaka jinglaitluid, ki shipai Border Security Force (BSF) kila pynlong iaka “Cycle Rally” kaba la sdang na ICP Akhaura, Tripura bad kine ki nongniah saikil kila wan poi hynne ka sngi hapoh jylla Meghalaya.
Ha katei ka Cycle Rally kila don 19 ngut ki nongniah saikil kiban niah ia ki saikil naduh Tripura haduh South Bengal kaba kot sha ka 2200 Km.
U DIG, Sector Jowai u Sandeep Rawat ryngkat bad ki heh ophisar kila pdiang sngewbha ia kine ki nongniah saikil bad pyndeng syntiew iaki haba kila wan poi sha ka jylla Meghalaya bad la pynlong ruh iaka prokram tem halor ka jingwan poi ki nongniah saikil.
Nalor kane ki khynnah skul ka Holy Cross School, Umkiang kila pynlong iaka Cultural Programme ha kaba ki nongniah saikil kila dap da ka jingsngewtynnad bad kujuh ruh ki paid nongshongshnong kiba sah ha ki thain khappud.
Ka jingthmu jong katei ka Cycle Rally ka long ban pynsaphriang iaka khubor ban wanrah iaka jingshngain na ka bynta ki paidbah kiba sah ha khappud ban rat dyngkhong ia ki kam be-aiñ, ka jingktah jong u drok bad ban pynshlur pat ia ki samla ba kin rung haka kam shipai BSF kiba long ki shipai kiba hakhmat eh ban iada ia u pud u sam jong ka ri.
Haduh mynta, kine ki nongniah saikil kila niah haduh 420 Km bad ka jingniah saikil tang ha ka jylla Meghalaya kan long kumba 245 Km da ka jingthmu ban pynsngewthuh ia ki paidbah ban don iaka mynsiem jong ka jingiatylli, ban ieid ri bad ban ia burom mar kylliang kum ki nongshong shnong ka ri India.
