Itanagar, Naiwieng 19 :U Myntri Rangbahduh (PM) Narendra Modi mynta ka sngi ula wan ban plie ia ka kad liengsuin kaba don ia ka madan phlang ba jyrngam kaba dei ruh kaba nyngkong eh ha Arunachal Pradesh hajan ka nongbah Itanagar.
Kane ka kad liengsuin Donyi Polo airport ha Hollongi kan kyntiew ha kaba iadei bad ka jingpyniasoh bad kiwei pat ki thain, kumjuh ha ki kam khaii pateng bad ki kam jngohkai pyrthei ha ki jaka lum jong kane ka jylla ka thain shatei lammihngi (Northeast) jong ka ri.
Ia u mawnongrim na ka bynta kane ka kad liengsuin la wan buh da u PM Modi ha u snem 2019.
Shwa ka jingplie ia katei ka kad liengsuin, na ka liang u Myntri Rangbah ka jylla u Pema Khandu ula jurip bniah ha kaba iadei bad baroh ki jingpynkhreh na ka bynta ka jingwan jngoh jong u PM Modi.
“Ngi la shim ia baroh ki sienjam ban pynlong ia kane ka sngi ka ban sah jingkynmaw,” ong u Khandu.Na ka liang ka sorkar bad ki bor pyniaid ka Airports Authority of India kila pynkhreh ia ki jaka shong na ka bynta kumba 10,000 ngut ki briew ba kin sakhi halor kane ka jingplie ia kane ka kad liengsuin da u PM Modi ka ban sah histori,” ong u Khandu.
Nalor kata u CM ula ong shuh shuh ba ki paidbah ka jylla Arunachal kin ioh shibun ki jingmyntoi namar kane ka jylla kan pyniasoh bad kiwei pat ki sorbah ba kongsan jong ka ri.
Ka Hollongi terminal ka lah ban kdup ia haduh 200 ngut ki passenger ha ka shi kynta bad la tei ia kane ha ka jinglut kaba T. 955 klur. Kane ka terminal ka don ia ka jingheh kaba haduh 4100 sq mile.
La tei ia kane ka kad liengsuin ha ka jaka kaba heh haduh kumba 690 akar bad kaba la kot sha ka 640 million.Kane ka kad liengsuin ka long kaba biang bha ban pyntreikam ha ka por mynsngi ha baroh ki lieng namar ka jingdon ia ka runway kaba jngai kumba 2,300 mile.
