Shillong, Iaiong 28: U Samla Teimiki Sungoh ba na Shangpung West Jaintia Hills uba long ruh u Executive Member jong ka seng MeSCMA, ula wan nyngkong haka Rock Climbing Competition jong ka Advance Mountaineering Course ka Himalayan Mountaineering Institute (HMI), Darjeeling.
U Teimiki Sungoh shen yn sa ioh iaka kyrdan Grade “A” kaba long ka Grade kaba heh tam kaba ai da ki Mountaineering Institute halor ka jingleh bha ka jongu ha ka Training Course jong ki 58 ngut ki nongioh jinghikai ne Trainee na kylleng ka ri, la pynpaw ka MeSCMA ha kyrwoh khubor hynne ka sngi Thohdieng.
Ia katei ka training course la pynlong naduh ka 1 tarik u Iaiong haduh ka 28 tarik u Iaiong bad u Teimiki ula leit iahsimbynta ha katei lyngba ka jingkyrshan jongka Directorate of Sports and Youth Affairs lyngba ka Meghalaya State Olympic Association.
Ha katei ka jingioh jinghikai, ki nongshah hikai ki hap ban leh iaka Rock Climbing Training, Ice & Snow Craft, Navigation, High Altitude Training haduh ka jingjrong kaba kot palat 17,000ft bad ka jingpyndonkam ia ki tyllai bad ki kor ki bor ka juk mynta na ka bynta ban ai jingiarap ia kiba shem lanot ha ki khyllipmat kiba jynjar.
Ki Nongshah hikai ki hap ruh ban long kiba khlain ha ka met ka phad bad ha ka jingmut jingpyrkhat bad ban don iaka jinglong kaba kylluid ha ka jingiatreikam kum ka kynhun bad ban don ruh iaka sap nongialam ha ki.
