Shillong, Naiwieng 24: Ki nongwad bniah ka Researcher Centre for Bhutan Gross National Happiness Studies (GNHS) hynne ka sngi Thohdieng, kila wan lum jingtip napoh ka Khasi Hill Autonomous District Council (KHADC) haba ba iadei bad ka rukom treikam jong ki District Council hapoh Meghalaya.
Kane ka jingwan wad bniah (Research) ki briew napoh ka Ri Bhutan kadei ruh naka bynta ban tip halor ka riti dustur, ka ktien, ka jinglong kyrpang ki nong Meghalaya, ka khuid ka suba bad ka jinglong trai iaka khyndew da ki paidbah hapoh ka Jylla.
Haba kren sha ki lad pathai khubor ,ka nongwad bniah lane ka Researcher jong ka Bhutan Gross National Happiness Studies (GNHS) ka Kencho Dema kala ong ba kane ka jingwan jong ki sha KHADC kadei ban tip, kumno ki District Council hapoh Meghalaya ki treikam bad naei ki ioh iaka bor synshar.
“Haka jingiatai ki nongialam ka KHADC, la sngewthuh ba ki don katto katne ka jingiasyriem hapdeng ki nong Meghalaya bad ki nong Bhutan bad kane ka pynlong suk ia baroh ban sngewthuh, iaki ain tynrai kiba don hapoh kane ka Jylla bad ki ain tynrai kiba don hapoh ka Ri jong ngi” ong ka Kencho.
Ka Kencho kala ong ba ka jingialang hynne ka sngi, ka long kaba sei soh namar la ioh ka jingia sam mar kylliang iaki jingdonkam haba iadei bad ka jinglong tynrai, ka riti dustur ki briew hapoh kane ka Jylla bad hapoh ka Ri Bhutan.
“To ngin ia hikai markylliang bad to ngi pyntreikam iaki ain kiba bha, la kadei jong ki District Council hapoh Meghalaya ne ki ain kiba bha jong ka Bhutan na ka bynta ban iarap ban kyntiew mar kylliang namar kane kan iarap ban pynlong ia kane ka thain, kum ka thain kaba bha tam hapoh ka pyrthei baroh kawei” kala ong.
Naka liang u Chief Executive Member (CEM) ka KHADC Bah Pyniaid Sing Syiem ula ong ba ka thong jong ka jingialang kadei hi ban ia sngewthuh mar kylliang haba iadei bad ka jinglong kyrpang ki breiw hapoh Meghalay bad hapoh Bhutan.
U Bah Pyniaid ula iathuh ba ki nongwad bniah napoh ka Ri Bhutan kila wad bniah halor ka jinglong kyrpang ki District Council hapoh Meghalaya, ka riti dustur ki paidbah, ka rukom bat khyndew bad ka ktien ka thylliej jong ki nong shong shnong.
