Shillong Nailar 04: U Additional Director General, BSF (Eastern Command), Kolkata, u Ravi Gandhi, ha ka jingwan jngoh ia ka BSF Meghalaya Frontier, ula khmih bad bishar bniah ia ki kam bapher bapher kiba iadei bad ka jingtreikam jong ki BSF.
Ha ka sngi saitjain, u ADG ula leit sha ki thain khappud ka East Khasi Hills ban bishar ia ki jingeh ha ka rukom treikam bad ka buit treikam kaba la pyndonkam da ki shipai iada khappud. Ula ban jur halor ka jingshisha ba ki BSF ki iada bad ki pynneh pynsah ïa u pud u sam jong ka Indo-Bangladesh ha ka rukom kaba tbit wat hapdeng ki jingeh kiba bun jait.
Ka jylla Meghalaya kadei kaba pawnam ha ka jingdon ia ka aiom kaba slap baroh 7 bnai hynrei khlem da kheiñ ia kitei kiei kiei baroh ki BSF kila ieng ban iada ia ki khappud da ka jingshlur.
Hynne ka sngi u Blei, u ADG ula pyniaid ia ka jingialang bad ki bor pyniaid district bad ki ophisar pulit jong ka Garo Hills District kaba kynthup ia u DIG Police, DC & SP Tura ha ryngkat ki ophisar BSF. Ki jingiakren ki kynthup ban kyntiew ia ka jingshaniah iwei ia iwei pat & ka kyrdan jong ka jingiatreilang hapdeng ki BSF bad ki Pulit.
U ADG ula jurip ruh ia ka kor peitngor ba la pyndonkam ban peit pyrman ia ka jinglong jingman bad ki jingtreikam ha ki khappud bad ula ban jur ia ka jingdonkam ban buh ia ki tiar pahara kiba thymmai tam ban pynthikna ba kana don ka jingpyniaid ryntih ia ki kam ki jam ha ki khappud.
Ula bishar bniah ia ki mat kiba iadei bad ki kam be-ain, ka jingwan rung tuh bad ka jingkhaii tuh.
U ADG ula ban jur ba ki paidbah ka jylla Meghalaya kidei kiba ieid ia ka jingsuk bad kiba iajan bad ki bor pahara bad kumta ki nongshong shnong kim pdiang ia ki nongwan rung tuh kiba hadien kin buh kylla ha ka jingeh ha kaba iadei bad ka ioh ka kot.Ula pynpaw ia ka jingskhem jingmut ban lah ban pynsangeh noh ia ka jingwan rung tuh bad ula ai ia ka jingbthah kaba shai bad ki shipai kidei ban long kiba husiar bha bad dei ban pynkhlain ia ka jingpahara ha shilynter u pud u sam ka Indo-Bangladesh khnang ban khanglad ia kino kino ki jingwan rung tuh ne jingrung be-ain.
U Gandhi ula ai khublei ruh ïa ki jingpyrshang ba la leh da ki Field Commanders bad ki Bordermen ban tehlakam ïa ki jingpyrshang ban rung tuh bad kiwei kiwei ki kam runar wat hapdeng ki jingeh bad ula ong ba ki BSF ki ïengskhem ha kaban pynneh ïa ka jinglong jingman bad ka jingshngaiñ jong u pud u sam ka ri.
