Shillong, Kyllalyngkot 09: Ka kynhun ki nongpathai khubor na ka jylla Uttar Pradesh kala wan poi sha ka jylla Meghalaya kum shi bynta ban khmih ia ka prokram Viksit Bharat Sankalp Yatra.
Hynnin ka sngi, katei ka kynhun kala leit jngoh ia kawei ka prokram jong ka Viksit Bharat kaba la pynlong hapoh East Khasi Hills District ha ka shnong Mawmihthied bad Swer bad kine ki nongpathai khubor kila ioh ia ka lad ban iakren bad ki ophisar ka sorkar jylla, ki Rangbah Shnong bad ki paidbah kiba ioh jingmyntoi na ki skhim sorkar.
Ka jingthmu jong kane ka media tour ka long ban plie lad ia ki ba kin ioh ban sakhi dalade ia ki kam pynroi kiba la pyntreikam lyngba ki skhim jong ka sorkar pdeng hapoh ka jylla Meghalaya bad ban iohlum khubor ia ki prokram bad ki projek kiba kongsan jong ki tnad bapher jong ka sorkar pdeng.
Ka long ruh ka lad na ka bynta kitei ki nongpathai khubor na Uttar Pradesh ban sngewthuh khambha ia ka jingshisha ha kaba iadei bad ka jingmyntoi na ka jingpyntreikam ia ki skhim ka sorkar pdeng hapoh ka jylla Meghalaya.
Ia katei ka Press Tour la pynlong da ka Press Information Bureau, Shillong ryngkat bad ka Press Information Bureau, Lucknow lyngba ka Ministry of Information & Broadcasting jong ka sorkar India.
Katei ka kynhun ki nongpathai khubor kala leit jngoh ruh ia ka jingbuh ia ki stall halor ki skhim sorkar kiba ai ia ki jingtip sha ki paidbah shaphang ki skhim kiba kongsan khnang ba kan long kaba ki paidbah kin tiplut bad ba ka jingpyntreikam iaka skhim kan poi lut sha ki nongioh jingmyntoi.
Ki nongpathai khubor kila iaroh iaka jingtrei shitom jong ka sorkar jylla kaba la pynlong ia ka Viksit Bharat Sankalp Yatra kaba jop wat ha ki thai nongkyndong.
Kane ka kynhun ki nongpathai khubor kan don haduh ka 11 tarik u Kyllalyngkot ha Meghalaya bad kan leit ruh ban jngoh ia ka West Jaintia Hills bad Ri Bhoi District ban lap ia ka jingshisha ha kaba iadei bad ka jingmyntoi jong ki skhim ka sorkar pdeng kiba la pyntrei hapoh Meghalaya.
