Shillong, Naiwieng 11 : Ka Tnad kaba iadei bad ka Parliamentary Standing Committee on Home Affairs, Rajya Sabha hynne ka sngi thohdieng, kala shong bishar ia ka jingtreikam ki skhim ka Sorkar Pdeng bala pyntrei ha Meghalaya kum shibynta na ka jingwan sha ka thain Shatei Lam Mihngi ka Ri ban wad jingtip ia kiei kiei baroh.
Kine ki skhim ki dei kiba la mang bad bei hapoh ka Ministry for Development of North Eastern Region (DoNER).
Ia kane ka jingialang bishar kam la pynlong ha Vivanta Mehalaya bad kiba la iashimbynta ki kynthup ia u Chief Secretary ka Jylla Bah DP Wahlang bad kiwei kiwei ki Heh Ophisar jong ki Tnad bapher bapher ka Sorkar Jylla.
Ka tyllong khubor ka iathuh ba ka Parliamentary Standing Committee (PSC) kan sa pynkhreh ia ka kaiphod bad kan sap hah sha ka DoNER Ministry ba kan leh ia kaba donkam.
Ka Ministry pat kan sap hah ia ka kaiphod jong ka PSC sha ka North Eastern Council (NEC) bad ka Sorkar Jylla ba kin pynteikam.
Kane ka kaiphod kan don ruh ia ki jingai jingmut ym tang jong ka Jylla Meghalaya hynrei jong ka thain Shatei Lam Mihngi baroh kawei.
Hadien kane ka jingialang, ki Dkhot jong ka PSC kila leit jngoh ruh ia ka Water Treatment Plant jong ka Greater Shillong Water Supply Scheme (GSWSS) kaba don ha Mawphlang.
Ha kajuh ka por, ka Committee kan sa leit iuhkjat sa ha Assam ha ka 14 tarik Naiwieng kum shibynta jong kane ka jingwad jingtip ia ka rukom pyntreikam ia ki skhim ka sorkar pdeng.
