Shillong, Naiwieng 07: Ka Kong Eldora Betsy Lyngdoh ba shong ba sah ha Mawkhar, Shillong kala ïoh ïa ka kyrdan kaba ar ha ka jingïakob thoh poitri kaba la wan ban shim bynta da ki riewshemphang na kylleng ki ri ka pyrthei, ïa kaba la tip kum ka International Literary Prize City of Arona 2025 ha ka thup Unpublished Poetry Section.
Ia kane ka jingiakop thoh poitri la pynlong hapoh ka ri Italy.
Ka Kong Eldora Betsy kadei ka kurim jong u Bah Ransom Sutnga bad kala long tang ma ka hi marwei kaban jop ia kane ka jingïakob na ka ri India ha kaba ïa ka kyrdan kaba nyngkong la jop da u nong Canada, ïa ka kyrdan kaba ar pat la ïa sam lang hapdeng ka Kong Eldora bad uwei uba na France bad ïa ka kyrdan ba lai pat la ïasam hapdeng u nong Belgium bad u nong Taiwan.
Ka Kong Eldora i la pynpaw ïa ka jingkmen kaba khraw ba i la ïoh ban jop ha kane ka jingïakob da kaba ïoh ban wan ha ka kyrdan kaba ar.
“Nga dap da ka jingsngewnguh ïa ka Cultural Circle jong ka Arona na ka bynta kane ka jingithuh bad ka jingsngewnguh ka leit ruh sha ki bor pynïaid bad ruh sha ki nongbishar. Kane ka jingjop ka ai mynsiem shuh shuh ïa nga ba ngan lah ban pynpaw shuh shuh ha ka jingthoh poitri,” kala ong.
Ha kane ka jingïakob kila don haduh 28 tylli ki ri kiba wan ban shim bynta ha kaba la plie lad ïa kiba tbit ha ka kam thoh jingïathuh khana lyngkot bad kumjuh ruh ha ka jingthoh poitri.
