Imphal, K’Lyngkot 22: Ki Pulit ka jylla Manipur kila pyntikna ia ka jingshah pyniap jong u wei u briew ha Churachandpur district hadien ba kawei ka video kaba la saphriang ha ki rynsan social media kaba pyni ia u dang ba u kyrpad ia la ka jingim katto katne por shwa ban shah siat iap, kaba la pynmih ia ka jingbitar kaba jur.
Katkum ka tyllong khubor na ki pulit la ong ba katei ka jingjia ka la jia ha ka miet sngi ba-ar.Ha ka por kumba 10:15 baje eiei mynmiet ki pulit jong ka Churachandpur ki la ioh jingtip ba u Mayanglambam Rishikanta uba 38 snem ka rta u khun jong u M. Tombi Singh na ka shnong Kakching Khunou Uchan Makhong Leikai kaba hap hapoh ka Waikhong police station u la shah rahbor ha ki riew sniew kiba ym lah ban ithuh na ka thain Tuibuong bad kham hadien ki la pyniap ha ka shnong T. Natjang.
Hadien kata la lap ïa ka met jong une u lanot bad la buh ïa ka ha ka district morgue.
Ki pulit jong ka Churachandpur ki la register ia ka suo motu FIR bad pynlong ia ka jingthwet ban lap bad ban kem ia kiba donkti, la iathuh ki heh ophisar.
Ka khubor na ki pulit ki la pynthikna ba u Rishikanta u dei uba la shongkurim bad kawei ka kynthei kaba dei na ka jaidbynriew riewlum.Hadien ka jingshong kurim jong u bad ka Chingnu, la iathuh ba u la shim ia ka kyrteng riewlum, kaba la tip kyrteng kum ka Ginminthang bad u la sah lang bad ka tnga jong u.
Ki tyllong khubor na katei ka thaiñ ki ïathuh ba kitei ki arngut ki dei na ki jaitbynriew bapher bapher bad ki la ïakhlad noh naduh ba la mih ka jingïakynad hapdeng ki ar jaitbynriew ha Manipur ha u snem 2023.
U Rishikanta, uba la leit trei ha Nepal, ula wanphai biang sha Manipur, kumba shi taiew mynshwa, da ka jingthmu ban ia kynduh biang bad ka kurim jong u. La iathuh ba ka jingsah jong u ha Churachandpur, ka la shah hadien ba ka tnga jong u, ka la pan jingbit na ki katto katne ki kynhun Kuki-Zo, hadien kata, kitei ki arngut, ki la ia sah lang, la kumba shi taiew eiei.
Ka video kaba la saphriang bha jong katei ka jingshah pyniap ka la pynmih ïa ka jingpynrem kaba jur ha ki social media, ha kaba kiba bun ki la pynpaw ïa ka kum ka jingpynkynmaw kaba pynkulmar ïa ka jingbteng jong ka jingsuk ha ka jylla.Ki tyllong khubor ki la pynpaw ba ki jingiakhih ki lah ban don ha ki jaka ba bun ki Meitei kum ka jingpynrem ia katei ka jingshah pyniap.
Ki bor pyniaid ki la kyrpad ia ki paidbah ba kin long jai jai katba ka jingtohkit ka dang iaid shakhmat.
