Shillong, Risaw 07: Ka kynhun ialehkai Cricket ka Meghalaya kala liem ha ka jingiakhun ba nyngkong jong ka Vinoo Mankad Trophy, ka jingialehkai One Day Tournament ki Khynnah shynrang ba hapoh 19 snem, pyrshah ia ka Odisha.
Ka Meghalaya kala shah rem da hynniew wicket ha kane ka jingialehkai kaba long hynne ka sngi Thohdieng ha Pune.
Ka Meghalaya kala shah phah tied nyngkong hadien ba ka Odisha kala jop ia ka jingkynting pisa bad kala ialehkai bha haba sdang da ka jingialah kamai run paralok ba 43 runs hapdeng u Mrityunjah Bharali ba ioh 21 run bad u Mrinal Das uba ioh 13 runs.
Ka jinghap noh ka wicket u Bharali uba dei u Captain, kala wanrah ia ka jinghap wicket haduh san ngut bad ioh kamai tang 14 run.
Ka Meghalaya kala lah ban kamai tang 104 run ha ka 45.2 over bad kiwei ki rang ba ioh kamai run ki dei u Shavian Blah ba ioh 11 run, u Banialam Mylliemngap-13, u Jeremiah L Kynshi 7 run bad u Gavineal Marpna 9 run.
Ka Odisha kala lah ban beh ia kane ka thong tang hapoh ka 21.3 over.
Ka Meghalaya kan iakynduh mynta ka sngi pyrshah ia ka Goa. Ka jingialehkai sdang hapdeng ka Goa bad ka Tripura hynne ka sngi kala pulom namar ka jinghap slap.
