Shillong, Risaw 18: Ka kynhun jong ka Meghalaya kaba iakhun ha ka U-19 Men’s kala shah pynrem da 7 Wiket ha ka Delhi ha ka jingiakhun iaka Vinoo Mankad Trophy kaba la long hynne ka sngi ha Vijayawada.
Ka Meghalaya kala tied nyngkong ha kaba mar ia sdang u Lensbirth N Marak ula kamai 17 Run katba u Kshitij Singhania ula ioh 11 Run, hynrei hadien kala hap lut ki nongtied da kaba kamai tang 76 run ha ka 33.4 Over.
Haba ka Delhi kala leit ban tied, u Shavian Blah ula ioh khur ia ka wiket da kaba kawang ia ka bol kaba nyngkong eh jong ka jingiakhun bad ha ka Over kaba Ar u Bilgrak G Sangma ula ioh pynhap sa ia uwei u nongtied jongka Delhi bad ha ktei ka por ka Delhi kalakami 7 Run bad hap 2 Wiket.
Hadien kane u Tarun Bisht ula kamai 42 run khlem out na ki 16 bol bad ula pynjop syndon ia ka Delhi ha ka7.2 Over.
U Shavian ula ioh 2 wiket bad ai 49 run bad u Bilgrak ula ioh 1 wiket.
Ka Meghalaya kan iakhun khatduh eh bad ka Maharashtra ha ka sngi Thohdieng.
Katba ka kynhun jong ka Meghalaya ha ka Senior Men, Syed Mushtaq Ali Trophy T20 Tournament, kan iakhun pyrshah iaka Mizoram lashai ka sngi bad ka kynhun ki kynthei jong ka jylla kan iakhun nyngkong pyrshah iaka Pondicherry ha ka Senior Women’s T20 Trophy ha Vadodara lashai ka sngi.
