Shillong, Rymphang 28: U kyrtong ka All India Trinamool Congress (AITC) na Ranikor konstitwensi u Tengsim G Momin hynne ka sngi ula ujor sha ki Pulit pyrshah ia u Sailus Sangma halor ka jingkynnoh pynjah iaki kot ki sla ba donkam (Original Documents).
Haka ejahar sha u Superintendent of Police (SP) ka South West Khasi Hills, u Tensim G Momin ula kynnoh ba u Sailus Sangma u ba shong ba sah Goalsora South West Khasi Hills District u badei ruh u Adviser/Election Agent ula pynjah iaki kot ki sla (Original Documents) kum ka Nomination Papers, Voter ID Transfer Paper bad kiwei kiwei ki kot ba donkam.
Ula kynnoh ba u Sailus ula pynjah khnang ia kine ki kot ba donkam daka ba kwah pynthoh bria ia u bad iaka Party baroh kawei.
Halor kane naka liang u Tengsim Momin ula kyntu iaki bor Pulit ban shim sienjam pyrshah ia u Sailus namar kane ka jingleh jong u ka lah ban wanrah ka nam sniew ia u bad iaka Party.
