Shillong, Risaw 13: U MLA ba shah sospon ka VPP na North Shillong constituency Bah Adelbert Nongrum ha ka sngi Nyngkong, ula phah tuklar ha u Symbud Myntri Rangbah ba khmih iaka tnat Transport Bah Sniawbhalang Dhar halor ka jingkynnoh ba don ka ki Company ki bym pat don Licence kiba treikam kum ki Aggregator ban pyniaid taxi arshaka kaba long beain katkum ka Meghalaya Taxi Aggregator Operational Rules, 2020 bad halor ka jingslem ka Sorkar ban ai jingbit iaka Jets 24×7 ban ioh jingbit ban sdang kamai taxi daki arshaka.
Haba kren bad shaki lad pathai khubor, u Bah Adelbert u la ong ba watla ka Jets 24×7 kala pynbiang ïa baroh ki kyndon ba donkam, hynrei haduh mynta ka dang mad jingeh namar ka Sorkar kam pat ai jingbit ban ioh sdang kamai taxi daki arshaka.
Ka Jets 24×7 kala ap mynta la palat 11 bnai ban ioh jingmynjur naka Sorkar hynrei haduh mynta ka Sorkar kam pat phah ktien, la ka Company kala ioh ne em iaka jingbit ban sdang kamai.
“Nga sngewkhia jur ym tang ia ka jingbym leh eiei pyrshah ia ki Company ba pyniaid kamai daki arshaka hynrei ruh ia ka rukom bym ryntih bad bym iahap ka rukom pyniaid ka Regional Transport Authority (RTA). Ka Jets 24×7 ka la pynbiang ia baroh ki kyndon ba donkam, hynrei kam pat ioh ka jingmynjur ban sdang kamai la palat 11 bnai. Kane ka jingleh ka tnat Transport ka long ka bym lah ban pdiang” ong u Bah Adelbert.
U Bah Adelbert u la ther tyngeh ruh ia ka tnat halor ka jingleh bym suidniew ka tnat iaki Company ki bym pat ioh License ban kamai hapoh ka Jylla kaba pynkhein ia ka Meghalaya Taxi Aggregator Operational Rules, 2020.
“Balei ka tnat ka ailad ia kum kine ki jingpynkhein kiba paw pyrthei katba ka pynslem ban ai ka jingmynjur iaka Company trai Jylla” ula ong haba buh jingkylli daka ba ong “kane kan pynshlur ia ki kam beain bad ka wanrah ia ki jingma kiba shisha ia ki nongleit nongwan.”
“Kane ka jingpynslem ym tang ka pynduh mynsiem ia ka jingseng kam seng jam kaba hok hynrei ka buh ruh ha ka jingma ia ka jingim jong kiba bun ki samla bym don kam don jam kiba la aiti ha kane ka rynsan da ka jingsngewbha” u la bynrap.
U MLA u la ban jur ba ka kamram jong ka Sorkar ka dei ban kyntiew bad kyrshan ia ka kam seng kam seng jam kaba hok, ym ban pynduh mynsiem ia ka lyngba ka jingshim rai kaba slem bad kaba khlem iahap.
“Nga la thrang ban iohi ia ka jingshim khia jong phi mardor na ka bynta ka jingbha jingmiat jong ki samla jong ngi namar ba ka Sorkar ka dei ban long kaba ai mynsiem ym ban pynduh mynsiem” ula ong.
Katkum ka jingong jong u, ka Sorkar ka dei ban phah ïa ka khubor kaba shai ba ka jingsynshar kaba pynshong nongrim ha ki kyndon bad ka rukom treikam kaba hok bad kaba khuid ka dang don.
