Shillong ,Naiwieng 01: Ka Dorbar Shnong Wahlyngkien Sunei kaba hap hapoh ka Mawphlang Lyngdohship, hynne ka sngi Balang, kala ujor sha u Myntri ka tnat Public Health Engineering (PHE) ha ryngkat ka jingkynnoh ba ki nongtrei ka Treatment Plant kaba don ha Mawphlang, ki pyntuid jaboh sha ka Wahrina.
Haba kren sha ki lad pathai khubor u Rangbah Shnong ka shnong Wahlyngkien Sunei Bah Arbistar Lyngdoh ula kynnoh ba kane ka jingpyntuid jaboh daka PHE Electrical Mawphlang Division sha ka Wahrina kala ktah iaki paidbah kiba sah harum jong kane ka Wah.
U Bah Arbistar ula iathuh ba bun ki nong shong shnong ha kane ka thain kidei ki nongrep bad kane ka jingpyntuid jaboh Chemical sha kane ka Wahrina kala ktah bha iaka um naka bynta ban pyndonkam iaki mar rep bad kumjuh ruh iaka jingdonkam ki paidbah.
“Kane ka jingpyntuid jaboh Chemical daka tnat PHE kala iaid kumba 20 snem eiei mynta bad kane kala ktah iaki paidbah bad iaki mar rep jong ki nongrep” la ong u bah Arbistar.
U Bah Arbistar ula iathuh ba ka jingiakynduh ia u Myntri ka tnat PHE ka long kaba seisoh namar u Myntri ula kular baka tnat kala pynkhreh ban mang haduh T.15 klur naka bynta ban tei daka Treatment Plant ban pynkhuid iaki jaboh Chemical kiba mih naka PHE Electrical Mawphlang Division.
Ula iathuh ban aka liang u Myntri ula kular ruh ban wan jurip hi ia kane ka jaka ban lap hi da lade namar ka tnat kala kala pynkhreh ban pyntrei noh iaka Treatment Plant ha u bnai Kyllalyngkot 2024.
“Naka liang ka Dorbar Shnong Wahlyngkien Sunei ka sngewnguh iaka jingkular u Myntri ka tnat PHE hynrei lada ka tnat kam bat iaka jingkular, ki nongshong shnong ki long kiba la pynkhreh ban ujor shaka NGT” ula ong.
Pule lang ia kane: Hukum ka Iingkashari ban set along haduh 14 snem ia 2 ngut ki Nongleh beijot
Peit lang ia kane
