Nongpoh, K’lyngkot 13 : Ka Shnong Umshangling, kaba don marjan ka sor Nongpoh, kala leit ban ujor hynne ka sngi Nyngkong, sha u Deputy Commissioner ka Ri-Bhoi District halor ka jingwan tep metiap ka bym don nongkam, hapoh ka jaka tep briew kaba hap hapoh ka Shnong.
U Rangbah Shnong Bah James Maiong ula pyntip ba kane ka jingwan tep metiap kala jia hynnin ka sngi bad la kynnoh ba ki briew kiba wan tep ia kane ka metiap, kila shu tep tang dep khlem da tap bha ia ka thliew haduh ba ki ksew kila khlong ia ki dkhot met bad pynsaphriang hapoh ka Shnong.
Ula ong ba kane ka jingleh khlem akor kala buh jongma ia ka koit ka khiah jong ki nongshnongshnong khamtam ka jingsma kaba la mih na katei ka jaka.
U ong ba dei halor kane ka nongrim, ka Shnong kala leit ban ujor sha u Deputy Commissioner namar ka jingwan tep khlem akor ia ka metiap ha ka jaka tep ia ki briew ki bym don nongkam.
U Secretary Shnong Bah Vincent Sohkhwai, ula kynnoh ba kane ka jingleh khlemakor ka long kum ka jingibein ia ki nong shongshnong ka Umshangling. Ula ong ba ki bor Shnong kila ai sngewbha ia ka jaka tep ia ki metiap ki bym don nongkam hynrei ki borkhmih ka Sorkar kila leh bym suidniew bad niewbein ia ka Shnong.
Ha kane ka jingujor, ka Shnong kala pynpaw ba kan ym pdiang satia ia kum kane ka jingleh bad byrngem ba lada kum kine ki jingjia kin dang jia biang, ka Shnong kam banse ban khang noh ia ka jingwan tep ia ki metiap.
Ha kajuh ka por, kala dawa ruh ia u Deputy Commissioner ban phah buh noh da ki briew ban peit pyrman bad ban pyntip sha ka Shnong haba don ka jingwan tep ia ki metiap ha katei ka jaka.
Na ka liang u Deputy Commissioner ula pynpaw ia ka jingsngewkhia halor kane ka jingjia bad ula kular ba un sa lum kyrkieh ia ka jingialang hapdeng ki bor ka District, ka Nongpoh Town Committee bad ki bor pyniaid district ban iakren ia kane ka kam haba pynthikna ruh ba kum katei ka jingjia kan ym wan jia shuh nangne shakhmat.
