Shillong, Risaw 23 : Ka Khasi Students’ Union (KSU)-South West Khasi Hills District, ha ka sngi Balang, kala leit ujor sha u Deputy Commissioner ka District halor ka jingsuba ba ka Geological Survey of India (GSI) ka thmu ban wad tohkit bad wad ia ka jingdon u marpoh khyndew uranium ha ki 13 tylli ki Shnong ka District.
Kane ka Seng hapoh ka jingialam u President Forwardman Nongrem, ka suba jur ba ka Geo-Scientific Investigation jong ka GSI ha ka thain Mawkyrwat, ka don kaei re kaei sha lyndet.
Ki shnong kiba ka GSI ka thmu ban leh iaka Geo-Scientific Investigation ki dei ka Mawkyrwat, Mawten, Mawlangwir, Nonglang, Wahsiej, Mawkyllung, Marshilong, Nongbah Marshilong, Mawtle , Sakwang, Pyndensakwang, Jakrem bad Nongmawlein Pawphlang
Ka KSU-SWKH ka suba jur ruh ba kane ka lah ban dei ka comprehensive environmental impact assessment kaba ju leh shuwa ban tih marpoh khyndew, tang ban pyndep ia ki kyndonat kumka Environment (Protection) Act, 1986 bad ki kyndon ka International Atomic Energy Agency bad ka World Nuclear Association hashuwa ban tih Uranium.
Ka pynpaw ruh ia ka jingartatien namar ka GSI ka ju leh ia ka field survey ban wad uranium ha kiwei ki Jylla ka ri India kum ha Maharashtra, Chattisgarh bad ka Sonbhadra District jongka Uttar Pradesh.
Ka ong ba kat kum ki kot ki sla ba lap da ka seng, ka GSI ka thmu ban leh ia ka Geological mapping, sample collection bad ka Pitting & Trenching kaba kynthup iaka drilling kaba lah ban kot 10 metres ne kham jylliew.
Kane ka Seng kala pynpaw hakhmat u DC ba ka GSI kala wan ha ka thain Mawkyrwat khlem da ai jingtip ne batai bniah sha ki paidbah ba kan leh ia kane ka kam bad ka khlem iasyllok ruh ia ki shnong bapher bapher hashuwa ba kan pyniaid shakhmat ia ka field survey.
Kala kynthoh ruh ba ka GSI ka khlem kren shai ne pyntip ia ki mawpoh khyndew ba kan shim nuksa (sample) na kine ki shnong nalor ka khlem ai jingtip ruh sha ka KHADC bad kiwei kiwei.
Ka KSU ka pyntip ba na ka liang u Deputy Commissioner ula kular ba un sa lum ia ka jingialang bad ki shnong, Sengbha lang bad ka GSI ban pan jingshai halor katei ka kam.
-South West Khasi Hills District, ha ka sngi Balang, kala leit ujor sha u Deputy Commissioner ka District halor ka jingsuba ba ka Geological Survey of India (GSI) ka thmu ban wad tohkit bad wad ia ka jingdon u marpoh khyndew uranium ha ki 13 tylli ki Shnong ka District.){kind=link}