Shillong, Rymphang 24: Ka Khasi Students Union-Nongpoh Circle, hynne ka sngi Nyngkong, kala leit ujor hakhmat u Deputy Commissoner ka Ri-Bhoi Arpit Upadhyay, halor ka jingdon ki dukan die kot skul kiba shim kabu ban die rem ia ki kot skul.
Kat kum ka jingujor, ka KSU kala pyntip ba ki don katto katne tylli ki dukan die kot skil ha Iew Mawlong, Nongpoh, kiba la shim kabu shaba palat liam, da kaba die tam ia ka dor jong ki kot wat na ka dor barem duh bala buh da ki nongshon ia ka kot ne ka Maximum Retail Price.
Ka KSU hapoh ka jingialam u Secretary ka Education Cell samla Baiashanlang Kharshanlor, kala shim ia kane ka sienjam halor ka jingud jingnam jong ki Kmie ki Kpa kiba leit thied kot skul na ka bynta ki khun. La kynnoh ba kine ki dukan die kot kila die iohnong shaba palat ia ki kot kaba long hapdeng 15 haduh 20 tyngka kawei ka kot.
Lah ban kdew hangne, ka KSU-Education Cell jong ka Nongpoh Circle, ha ka 24 tarik Rymphang, kala leit ban jurip ia ki dukan die kot kiba don ha Iew Mawlong, Nongpoh bad lap ba ki don shisha ki dukan kiba shim kabu na ka jingdie ia ki kot skul.
