Nongpoh, Jylliew 13: Ka Khasi Students Union (KSU)-Saiden Unit, hynne ka sngi Ba-ar, kala ujor sha ka Tnad Forest & Environment ka Jylla, pyrshah ia ka jingshyrkhei ka jingkhlong shyiap be-ain napoh ka Wah Iewsier kaba hap hapoh ka Umtasor Bead Territorial Forest Department.
Ia kane ka dorkhas bala soi da u President bad Secretary ka KSU-Saiden, la leit buh hakhmat u Assistant Range Forest Officer, Territorial Forest Department ( Umtasor Bead), Nongpoh Territorial Division haba dawa ba dei ban khein beain bad kurup noh mardor ia baroh ki kor khlong shyiap kat kum ki kyndon Ain.
Kat kum ka ujor, ka KSU-Saiden ka pyntip ba kala shem ia kane ka jingkhlong shyiap ha Wah Iewsier ka dei kaba pynkhein ia ka kyndon 2 jong ka MMDR Act, 1975 hapoh ka National Green Tribunal (NGT).
“Ngi la ioh ia ka jingtip ba ka jingkhlong shyiap be-ain kala iaid mynta ha Wah Umran ha Iewsier (thain Umtasor) bad la khlong ia une u shyiap da ki kor machine” ong ka dorkhas.
Ka pyntip ba ka seng ha ka 8 tarik Jylliew, kala hiar jurip ia kine ki jaka khlong shyiap ha Iewsier bad shem ba ki briew kila pyndonkam da ka machine ban khlong ia u shyiap napoh ka wah.
“Kane ka jingkhlong shyiap kala pynjngut bad pynjaboh ia ka wah, kaba la ktah pat ia ki doh um doh pnat kiba im ha ka bad kumjuh ruh ia ki bynta jong ka wah kiba don sharum” kala ong.
Ka KSU kala ong ba namar kane ka jingkhlong shyiap, kala wanrah ruh ia ka jingtwa bad jingshah rong noh ki jaka harud jong ka wah.
-Saiden Unit, hynne ka sngi Ba-ar, kala ujor sha ka Tnad Forest & Environment ka Jylla, pyrshah ia ka jingshyrkhei ka jingkhlong shyiap be-ain napoh ka Wah Iewsier kaba hap hapoh ka Umtasor Bead Territorial Forest Department.){kind=link}