Shillong, Naitung 26 : Ka Khasi Students’ Union (KSU) ha ka sngi Balang kala ujor da ka ejahar pyrshah ia ka Twitter Account ha ka kyrteng “Legal Rights Observatory-LRO @LegalLRO” halor ka jingkynnoh ia ka KSU ba ka kynshoit ban wanrah ia ka jingsngew iapher niam na ka jingjia ba jia ha Mahadev Khola myn ha ka sngi Nyngkong.
U General Secretary ka KSU samla Donald Thabah ula ong ba kane ka jingkynnoh jong kane ka LRO ka dei ka “Bym shong hok” bad “bym don nongrim”.
“Ka KSU kala rai ba namar ka jingkhraw palat ka jingkynnoh, ngim banse ban ujor da ka ejahar ha u Superintendent of Police ka Shillong City” ong u samla Donald.
Lah ban kdew ba ka Legal LRO ha ka Twitter kala kynnoh “Ki runar ka KSU kila hiarthma ia ka mandir ka Mahadev Khola, 101 Area, Lower Lawsohtun, Shillong Meghalaya. Ngi lah ban iohi ia ki ba ki shoh ia ki lyngdoh niam, ki riewngeit kynthei kynthup ki bahaiing u lyngdoh niam. Hato ka Balang Presbyterian kan sangeh noh ia kane ka jingbuhshun?”.
U samla Donald ula ong ba da ka jingkynnoh ia ka Balang bad ia ka Seng ba donkti ha kum kane ka jingjia ka dei kaba bakla shaba palat. Ula ong ruh ba ka KSU kam don jingiadei satia bad kino kino ki Seng niam hynrei ka KSU ka ieng n aka bynta ka bha ka miat bad ban iada ia ka Jaidbynriew Khasi.
“Ngin (KSU) ym leh satia ia kino kino ki kam kiba lah ban ktah ia kano kano ka kynhun niam” ula bynrap.
Ula ong ba dei namar ka jingbym don ka ain ban tehlakam ia ka jingrung kyrthep ki mynder, kala pynbor ia ka KSU bad kiwei ki kynhun Sengbhalang ban mih shakhmat ha kaban iada ia ka Jaidbynriew Khasi.
Ula ong ruh ba ka jingkynnoh na kane ka Legal LRO ka dei tang ka jingpyrshang ban pynshit ban mih ka jingiakynad hapdeng ki Hindu bad ki riewlum Khristan ym tan gha Meghalaya hynrei ha ka Thain Shatei Lam Mihngi baroh kawei.
“Kaei kaba ki kwah ka long ka jingkyrshan na baroh kawei ka Ri India ba kin pyrshah ia ki riewlum…kane ka dei kaba bakla, namar ha ka jingiakhih pyrshah ia ka jingrung beain shapoh ka Jylla, kam shym la don satia kano kano ka khep ba hiar thma ia ki jaka leh niam” ula bynrap.
