Shillong, Rymphang 27: U chief electoral officer (CEO) ka jylla u bah F.R Kharkongor ula iathuh ba ka tnat pyniaid ilekshon kala ioh pdiang ka jingujor naka ka kyrtong jong ka KAM Meghalaya ba kala don ka jingsam pisa ha South Shillong konstitwensi.
Haba kren sha ki lad pathai khubor u bah Kharkongor ula iathuh ba hadien ka jingioh pdiang iaka jingujor, naka liang u District Election Officer (DEO) ula phah iaka kynhun Flying Squad ban leit tohkit.
“Hadien ba ka kynhun Flying Squad ka poi sha kato ka jaka kumba la ujor daka kyrtong jong ka KAM Meghalaya ryngkat bad ka jingkynnoh ba la don ka jingsam pisa, ka kynhun Flying Squad kam shym la lap eiei hynrei naka liang ka tnat pyniaid ilekshon kala shim khia halor kane ka jingujor” la ong u bah Kharkongor.
U bah Kharkongor ula iathuh ruh ba ka tnat pyniaid ilekshon kala ioh jingujor na kiwei ki jaka kum na Tikrikilla konstitwensi kaba hap ha West Garo Hills bad naka liang u District Election Officer (DEO) ruh ula leh iaka ba donkam ban phah tohkit haka kynhun Flying Squad hynrei ka kynhun kam shym lap eiei.
Ula ong ba kane ka jingbym lap eiei ka kynhun Flying Squad haba ki leit tohkit ka lah ban dei ruh ba ki Video bala ring bala kam ruh ba ka don ka jingsam pisa ka lah ban dei ba la ring ia kine ki Video ha kawei por bad haka por ba ka kynhun Flying Squad ka poi ha kato ka jaka kim shym la lap eiei shuh.
