Nongpoh, Naiwieng 07 : Ka Joint Action Committee -Umdap area, ha ka sngi Palei, kala leit ujor sha u Executive Engineer ka Tnad Public Works Department, Nongpoh Division halor ka jingkynnoh trei khlem dep u contractor ia ka surok PMGSY ba 5 Km na Pahammawlein sha Shakoikuna.
Ka surok Pahammawlein-Shakoikuna ka dei ka surok ba kongsan bad u budlum ia ki paidbah jong kiba bun ki shnong ka Ri-Bhoi khamtam ia ka shnong Umdap Rngi, Umdap Dimu, Pahamsohbor, Umjong, Khongwing bad Shakoikuna. Ka dei ruh kaba pyniasoh shaduh ka thain Marmain bad sha Byrnihat.
U Chairman ka JAC Lawrence Nongrum ha ryngkat ki Rangbah Shnong, kila iakynduh ia u Executive Enginer ka PWD Bah M Pyrbot, bad dawa ba un bthah ia u contractor ba un trei pyndep noh ia kane ka surok, kaba la ktah shi katdei eh ia ka leit ka wan u paidbah namar ka jingsniew bad khohruh khohram.
Haba iakren bad ki nongthoh khubor, ula pyntip ba kane ka surok ka dei kaba la pyntrei thymmai lyngba ka skhim PMGSY bad la pyntrei ia ka da uwei u contractor, uba la iehnoh shiteng ia ka kam.
U Bah Lawrence ula pynrem jur ia une u contractor uba la wan ban tih ia ka surok bad khlong tang ia ka rong kaba rim khlem da wan pat ban siang rong thymmai, kaba la pynsyrtoh ia ka leit ka wan u paidbah.
Ka JAC-Umdap Area ka aipor shitaiew ia u contractor ban sdang trei biang noh ia kane ka surok lem kumta ka JAC kan shim da ka sienjam kaba tyngeh.
