Nongpoh, Naiwieng 14 : Ka Hynniewtrep Youth Council-Ri-Bhoi Sepngi, kala ujor sha u Executive Engineer ka PWD-Nongpoh Division halor ka jingma kaba ap ia ka jingkieng Lailad kaba la tor, namar ka jingiaid khlem sangeh jong ki kali kit mar ba khia palat 9 ton.
Kane ka Seng kala pyntip ba kane ka jingkieng ka dei kaba la shongtor da ki phew snem bad ka dei ruh ka jingkieng kaba kongsan tam ia ka thain Ri-Bhoi Sepngi namar ka dei tang ma ka, kaba pyniasoh ia ka thain bad ka Ri-Bhoi District.
Ka HYC bala iala da u President RC Thangkhiew kala aiti da ka jingujor sha u EE ka PWD ba dawa ba u dei ban tuklar mardor ia kane ka kam le kumta ka seng kam banse ban leit khang hi dalade ia ki kali ba kit palat pud ban iaid na kane ka jingkieng.
Ha kajuh ka por, kane ka seng kala dawa ruh ia u EE ban peit lem ia ka jingsniew jong ka surok na Lad Umdu haduh Lad Umrit-kaba la sniew namar ka jingiaid jong ki kali heh kiba kit mar ba palat pud.
Nalor kane, kala kyntu ia u Deputy Commissioner bad ia u SDO ka Patharkhmah Civil Sub Division ba kin shimkhia bad phaikhmat lem halor kane ka kam.
