Shillong, Iaiong 24: Ka Hills Farmer’s Union (HFU) Mawlai Circle hynne ka sngi kala aiti daka jingthoh sha ka Myntri ka tnat ka rep ka riang kong Ampareen Lyngdoh haba iadei bad ka jingshah ot kilo ki marrep jong ki nongrep ka jylla haba leit die sha Iewduh.
Haba kren sha ki lad pathai khubor, u President ka HFU Mawlai Circle u bah Comingstar Kharumlong ula kam ba ka seng kala ju pynsngew sha ka sorkar halor kane ka jingshah ot kilo ki marrep jong ki nongrep naduh 2018 hynrei haduh mynta ka sorkar kam pat leh eiei halor kane.
U bah Comingstar ula ong ba ka HFU ka dawa na ka sorkar ba kan shna noh da ka aiñ lane pynrung noh ha kano kano ka kyndon aiñ ha kaba iadei bad ka jingshah ot kilo ki mar rep kaba la pynduh nong bha iaki nongrep.
Pule lang ia kane: Shah sospon shipor u Sordar ka Nongpoh Elaka Sirdarship
“Ngi dawa na ka sorkar ban leh eiei noh halor kane bad ka HFU ka kyrmen ba kane ka sorkar kaba mynta haka jingialam ka kong Ampareen kan shimkhia ha kaba iadei bad kane ka phang naka bynta ka jingmyntoi ki nongrep” la ong u bah Comingstar.
U bah Comingstar ula pyntip ba kane ka jingud jong ki nongrep kam dei kaba dang shisien ne arsien hynrei ka dei kaba na ka por sha ka por bad na ka liang ka HFU ym tang shaka sorkar jylla hynrei kala pynsngew ruh sha ka District Council, sha u Syiem ka Hima Mylliem hynrei haduh mynta ki nongrep ki dang mad hi iaka jingeh.
U bah Comingstar ula kam ba ki nongkhaïi haba ki shim ïa ki mar rep kim ju kylli ba kin ot ïa ki mar bad haba ki nongrep ki wan ban die ki shu shim beit ïa ki mar, ki kheiñ bad ki shu khate 10% na ki mar rep bad ka jingsiew ruh kam long shuh 100% hynrei ka la long noh tang 90% bad kane ka la long kum ka kam tuh namar la shim khlem ka jingïamynjur lang.
Pule lang ia kane: Kyrshan ka TGCSU ia ka jingdawa ka ACHIK ban pyntreikam ia ka Roster naduh 1972
