Nongstoin, Nailar 10: Ka FKJGP Rimuliang Circle hynne ka sngi balang, kala leit ban ujor sha u Deputy Commissioner ka West Khasi Hills halor ka jingkynnoh ba ka Sorkar Assam ka don jingthmu ban buh sa kawei ka ktem Pulit ba thymmai hapoh ka Shnong Umsynrieh, kaba hap hapoh ka Nongmynsaw Syiemship.
Ka FKJGP kala aiti da ka jingthoh ha une u Khliehduh ka District ba un pynpoi ia kane ka jingujor sha ki tyndong skhor jong ka Sorkar Jylla khamtam u Myntri Rangbah ka Jylla Conrad Kongkal Sangma, uba la shimkhia ban iakren pynbeit pud bad ka Sorkar Assam.
“Ngi ka FKJGP-Rimuliang, ngi la ioh jingtip na ki paidbah nongshongshnong ba ki briew sorkar ka Assam kila wan jurip ia kawei ka jaka ha Umsynrieh kaba don ha ka shnong Langpih, Nongmynsaw Syiemship ban shna ktem Pulit” ong u President bah Rusfullson Wanniang.
Kane ka shnong ka dei kaba hap hapoh ka Umsohram Langpih kaba dei ka jaka shimet jong u Bah Binen Syiem Nongbah, ula ong.
Une ki Nongialam ka FKJGP ula ong ba kane ka jingleh jong ka Sorkar Assam ka la pyni shai kdar ia ka jingbym burom ia ka kular status quo (bah pynneh kumba ka long) bala iateh hapdeng ki ar Jylla khamtam ka rai jong ka jingialang ki Myntri Rangbah ka Assam-Meghalaya ba dang shen ha Langpih, kaba ong ba ym dei ban kyntur pud thymmai ne leh ia kino kino ki kam ki ban pynthut ia ka shongsuk shongsain.
“Ka Assam ka dang kwah ban iai leh donbor beit halor ki jaka ki puta jong ki nongshongshnong ka thain Langpih baroh kawei” ula ong.
Namar kane, ka FKJGP kala dawa ia ka Sorkar Meghalaya ba kam dei shuh ban shu iai shah kem khlem nongrim ia ka jing leh beain jong ki briew ka Sorkar Assam.
“Ngi pyrshah jur ia ka jingthmu leh don bor da ka Assam ia ki briew jong ngi ba jia man la ka por. Ngi dawa jur ba ka Sorkar Meghalaya kam dei shuh ban shu peitkai, hynrei ka dei ban pyni noh ia la ka jong ka bor”, ong ka FKJGP.
