Nongpoh, Naitung 13 : Ka Federation of Khasi Jaintia and Garo People (FKJGP)-Baridua Circle ha ka sngi Nyngkong, kala leit ujor sha u Deputy Commissioner ka Ri-Bhoi District Dr Abhishek Saini, halor ka jingkynnoh ba pyndonkam da u PIN Code ka Assam ha ki jaka khappud ka District.
Kat kum ka jingmudui, la kynnoh ba katto katne ki jaka pule, ki karkhana bad ki dukan kiba don hapoh u pud u sam ka Meghalaya ha Ri-Bhoi, kila pyndonkam da u PIN Code ka Assam.
Ka FKJGP hapoh ka jingialam u President Samla Denis Nongrum, kala iakynduh markhmat ia u Deputy Commissioner bad pyntip ba kine ki jaka pule bad ki dukan ki dei kiba don ha ka shnong Baridua 9 mer, Meghalaya, kaba hap hapoh ka Raid Marwet.
Kane ka Seng kalaleit ruh ban iakynduh ia u Block Development Officer (BDO) ka Umling Block, ban pynpaw ia ka jingpyr shah ia kane ka jingpyndonkam bakla ia u PIN Case bad dawa ba dei ban shim mardor ia ki sienjan ban tehlakam ia kane.
Haba kren sha ki lad pathai khubor, u samla Denis Nongrum ula iathuh ba kat kum ka jingtip bala ioh lum da ka seng, ba ki jaka pule kila pyndonkam ia u PIN Code ka Assam wat ha ki momento bala sam sha ki khynnah skul kiba pass bha ha ka eksamin SSLC.
U ong “Kane ka jingpyndonkam ia u PIN Code ka Assam kala ktah jur bad pynmong ia ki nongshong shnong ka thain, ki ba sngew ba kane ka dei ka jingpynduh noh ia ka jinglong trai jong ki hala ka jong ka jaka”.
Ha kajuh ka por, ka FKJGP ka pynpaw ruh ia ka jingsheptieng ioh mih ka jingiasngewthuh bakla ha khappud, kaba lah ban poi sha ka jingiakynad ne ka jingiajia pud.
Ka FKJGP-Baridua kala dawa ia u Deputy Commissioner ba un shimkhia mardor iakane ka kam bad ban pynlong ia ka jing jurip kaba bniah khnang ban lap ia ka jingshisha bad ban shim ia ki sienjam kiba donkam.
La iathuh ba u Deputy Commissioner ula kular ban sa phah da ka shithi sha ka Postal Department ba kan pynlong ia ka jingtohkit halor kane ka jingkynnoh.
-Baridua Circle ha ka sngi Nyngkong, kala leit ujor sha u Deputy Commissioner ka Ri-Bhoi District Dr Abhishek Saini, halor ka jingkynnoh ba pyndonkam da u PIN Code ka Assam ha ki jaka khappud ka District.){kind=link}