Shillong, Rymphang 09 : Ka FKJGP-Upper Shillong Circle, hynne ka sngi palei, kala mudui sha u Deputy Commissioner halor ka jingeh ba ki paidbah ka thain Upper Shillong kila mad na ka jingjur palat ka jingdheng kali ha surok Umshyrpi-Upper Shillong ba jia manla ka sngi.
“Ka jingdheng kali ha kane ka surok (Umshyrpi-Upper Shillong) kala mih manla ka sngi ha kane ka shitaiew tam. Ki kali kiba hiar sha Shillong bad kiba kiew na Shillong lyngba kane ka surok, kila sahkut ha ka jingdheng kali ba da ki kynta, kaba la pynshohsat palat liam ia ki” ong u samla Kitboklang Nongphlang, President ka FKJGP-Upper Shillong Cirle.
“Ngi la pyrshang ban wad ia ki daw jong kane ka jingdheng kali bad lap ba ka daw hi ka dei namar ka jingsiang pipe um jong ka tnad Public Health Engineering (PHE) ha ka surok ba markhap ka Farm jong ka Tnad Animal Husbandry kaba don ha Sixth Mile, Upper Shillong” ula ong.
U samla Kitboklang ula ong “Kumba phi tip, kane ka surok ka dei kaba pyniasoh ia baroh ki thain jong ka Sohra Civil Sub-Division, baroh ki jaka ba hap hapoh ka Pynursla Civil Sub Division, baroh ki jaka ba hap hapoh ka Mawphlang Block bad Sohiong Block, baroh ki jaka ba hap hapoh ka Mawsynram Block bad baroh ki jaka ka West Khasi Hills, South West Khasi bad Eastern West Khasi Hills”.
“Namar kata kano kano ka jingdheng kali ha kane ka surok kan lam sha ka jingdheng kali kaba jur bha bad da ki hajar ngut ki nongleit nongwan, ki nongleit Ophis, ki nongshangkai pyrthei kin shah ktah jur bha. Ki paidbah na ki jaka khappud kiba donkam ia ki jingsumar ba kyrkieh ha Shillong ki dei kiba shah ktah jur bha” ula bynrap.
Une u Nongialam ka FKJGP ula ong ba kane ka jingdheng kali kala wanrah ia ka jingeh kaba jur ia ki samla pule khamtam kito kiba ialeh ia ki eksamin jong ja Pre-Board Examination, kiba la hap ban iaid da ka kjat ban poi sha ki jaka ialeh eksamin ha Shillong.
“Ka jingkylli ka long ba mano ban shim ia ka jingkitkhlieh lada kine ki samla pule kim lah ban poi sha ki jaka thoh eksam ha ka por kaba biang. Ki samla pule na Shillong kiba pule ha ki skul ba don ha ki thain Upper Shillong kum ka Army School ha 101 area bad Kendriya Vidyalayaha Eastern Air Command ki dei kiwei na kiba shah ktah bha” ula ong.
Ha kajuh ka por, u samla Kitboklang ula pyntip ba ka FKJGP ka don ia ka jingsngewkhia halor ka jingpynslem ia ka jingpyntrei ia ka kam ba iadei bad ka jingshna ia ka surok 4 lane na Umshyrpi sha Umtyngngar. U ong ba ki nongleit nongwan kila kylla long ki langknia namar kane ka jingpynslem kaba mih na ka kam iadie iathied jaka bad kiwei kiwei.
Ka FKJGP kala ai jingmut ba ka Tnad PHE ka dei ban siang noh ia ki pipe um ha ka por mynmiet ha kane ka surok namar ka jingduna ki kali ba iaid ba ieng.
Ka FKJGP ka kyntu ia u DC ba un bthah ia ki bor ba dei khmih jong ka Tnad Forest & Environment bad ka Meghalaya Energy Corporation Limited (MeECL) ba kin pynkloi ha ka jingpynkyllem ia ki dieng bad pynkynriah ia ki nar post elektrik ha shilynter kane ka surok jong ka project 4 lane khnang baka kam kan sdang noh ha ki jaka ki bym donkam ka jingiakajia.
