Shillong, Risaw 18 : U Vice Chancellor ka North Eastern Hill University (NEHU), ula mudui da ka ejahar sha ki Pulit ha Tura Police Station, kaba aibor ia ki Pulit ban tohkit halor ka jingshah thombor (ragging) u samla pule Naga ha NEHU Tura Campus ha ka step phyrngap jong ka 8 tarik Risaw.
Ia kane la pyntip da ki borkhmih ka NEHU ha ka jingialang bala pynlong da ka Naga Students’ Union, Shillong, ka Angami Elders’ Forum Shillong, ka Angami Students Union Shillong, ka NEHU Students’ Union bad ka Naga Students of NEHU, kaba long myn ha ka 16 tarik Risaw.
Kat kum ka kyrwoh na ka Media Cell ka Naga Students Union, Shillong (NSUS), la iathuh ba ki borkhmih ka NEHU kiba wan iashimbynta ha kane ka jingialang ki kynthup ia u Registrar Prof SR Joshi, Chairman ka Fact Finding Team Prof Lucy Zehol, ka ban tohkit ia kane ka jingjia ha Tura Campus.
La pyntip ha kane ka jingialang ba u VC ula mudui ia ka ejahar ha ka 14 tarik Risaw, kaba aibor ia ki Pulit ba kin pynlong ia ka jingtohkit kaba bniah halor ka jingshah thombor bad shah pynlaw lyngkhuid u samla Naga ha Tura Campus ka NEHU.
La ong ba u VC ula dei ban wan iashimbynta lang ha kane ka jingialang, hynrei u khlem poi satia namar ka jingshah khot hajir ha u Lat ka Jylla uba la shimkhia ia kane ka jingjia.
Ka NSUS ka ong, kane ka ejahar kala pynurlong ia kawei ka jingdawa bala buh hakhmat da ka NSUS myn ha ka 11 tarik Risaw, 2023.
Hynrei watla katta, kine ki kynhun Sengbhalang kila buh kyndon ia ka NEHU ba ka dei ban aiti ia ki kot ki sla sha ki bahaiing jong une u samla Naga ba shah thombor ban pynshisha ia kine ki sienjam ba kala shim.
Kine ki kynthup ia ka copy jong ka ejahar (FIR) bala ujor da u Vice Chancellor sha ki Pulit ka Tura, ka kaiphod bala pynkhreh da ka Fact Finding Committee halor kane ka jingjia, bad ka jingthoh na u VC ba kular ba ka NEHU kala kut jingkut ban shim ia ki sienjam ba dei ban shim haba pyntreikam pyrrkhing bha ia ki ain Anti Ragging ka UGC kam pher la ka jingtohkit ki Pulit ka sei soh ne em.
