Shillong, Jylliew 20 : U MP ba marwei ka Jylla sha Rajya Sabha Dr WR Kharlukhi ha ka sngi Palei, ula ujor da ka ejahar pyrshah ia u Nongleh Youtube Channel halor ka jingkynnoh ba u kynnoh bamsap ha ka jingpyntreikam iaka Members of Parliament Local Area Development Scheme (MPLADS).
Haba kren sha ki lad pathai khubor, u Dr Kharlukhi ula pynpaw ba u long uba kloi ia kano kano ka jingtohkit bad un iehnoh ruh ia ka kam MP lada shem ba u bamsap na ka jingpyntreikam ia ka skhim MP.
“Nga la ujor ia ka ejahar bad ka Cyber Crime Police Station pyrshah ia u nongleh Youtube ‘RS Kharbani’ namar ka jingkynnoh ba nga dei uba bamsap bad ka don ka jingbamsap ha ka jingpyntreikam ia ka skhim MP jong nga” ula ong.
“Lada don mano mano kiba don sakhi bad lada don kiba wan shakhmat ban ai sha ki lad pathai khubor ba nga la shim katta katta ka pisa, nga hi dalade ngan thoh sha ka Sorkar ban pan ia ka jingtohkit CBI bad nga long uba kloi ban leit sha along….phi lah ban leit sha ki shnong ki thaw, lada ki ong ba kane ka kam kam dei satia kaba leh ma ki, ka dei kaba leh da ki briew u Dr Kharlukhi, ngan iehnohkam kum u MP ha kane hi ka sngi” ong u MP haba maham ba u lah ban mudui da ka mukotduma mynram khmat pyrshah ia kino kino kiba pyrshang pynthohbria ia u.
“Nga treikam haba shit haba shai bad nga don 3 tylli ki bank account. Nga kloi ban pdiang ia kano kano ka jingtalasi da ki bor ka Ain” ula bynrap.
U Dr Kharlukhi ula ong ruh ba kane ka jingkynnoh kala wan ha ka por ba ula jan shongthait na ka kam sain pyrthei. “Nga la jan dap 40 snem ha ka kam sain pyrthei bad ngan sa shongthait noh shen hynrei kum kine ki kam kila mih, kumta nga sngew ba donkam ban pynshai namar nga long uba kloi ban pdiang ia kano kano ka jingtohkit ha kano kano ka por” ula ong.
Halor ka jingpyntreikam ia ki MP skhim, une u President barim ka NPP ka Jylla ula iathuh ba ula ioh nyngkong eh ia ka MP skhim jong u snem 2022-2023 namar kam shym la don skhim ha ka por ba lynshop kakhlam Covid. Ha katei ka jaka, ula phah ia ka jingtyrwa skhim sha ki Nodal Officer (Deputy Commissioner), ki ban sap hah pat sha ki Block Development Officer (BDO) ba kin pyllait ia ka pisa sha ki nongioh skhim ba kynthup ia ki Dorbar Shnong bad ki Kynhun treikam.
Hynrei ka rukom treikam kala kylla ia ka snem 2023-2024. Ha ka jaka jong ka Rural Development Department ha Delhi, ia ka skhim la pyllait beit beit da ka Parliament sha ki District Officer bad ki BDO, ula iathuh.
Haba pynpaw ba um don eiei satia ban buhrieh, u Dr Kharlukhi ula pyntip ba ula pyntreikam pura ia ka song T.5 klur bala mang na ka MP skhim u snem 2022-2023 katba ia ka skhim u snem 2024, ka dang shu poi mynta sha ki nongioh skhim. Ka jingslem ka dei namar ka jingdon ka elekshon Lok Sabha kaba dang shu kut dang shen.
Haba kylli, u MP ula ong ba ha ka jingiohi jong u ia ki Social Media ka long “ki dei ki pukni kiba bam tang ia ka doh pyut”.
