Hap pynthied Baje, Mobile, Kyiad bad pynbam bha ki Kompani ia ki Heh ka Tnad PWD
Shillong, Risaw 21 : Ka Sorkar Jylla kala ujor da ka ejahar pyrshah ia ki contractor jong ki kompani shimet bad ki Heh Engineer ka tnad Public Works Department (PWD) halor ka jingkynnoh bamsap na ka jingshna ia ka surok Shillong-Nongstoin-Rongjeng-Tura, kaba la mang haduh T.2366.77 klur.
Ia kane ka ejahar la mudui da u Chief Engineer (National Highway) PWD (Roads) myn ha ka 10 tarik Nailur 2024 hapoh ka Shillong Sadar Police Station, kaba long ruh kat kum ka jingbthah jong ka Sorkar Jylla.
Ki briew kiba shah jer kyrteng ha ka ejahar ki dei u B Seenaiah & Company Ltd (Project) Ltd (BSCPL) kaba don ia ka ophis ha Khairatabad, Hyderabad, ka kompani C&C Contruction Ltd lyngba u Managing Director Charanbir Singh Sethi kaba don ia ka Ophis treikam ha Gurgaon, Haryana, bad ka kompani M’s BSC C&C Joint Venture kaba don ia ka Ophis treikam ha Gurugram, Haryana.
Na ki Heh Engineer ka Tnad PWD pat kiba la shah jer kyrteng ha ka ejahar ki kynthup ia u MR Sangma, Chief Engineer bad baroh ki Chief Engineer hashuwa jong u, kaba dei hapdeng ka por ba ai contract ka PWD, Natonal Highway, u Executive Engineer (NH) barim ka tnad PWD lem bad ki Heh bad ki Nongtrei ka tnad PWD bad ki kompani shimet ki bym tip kyrteng.
U Dharamukkala Srinivasa Rao, uba trei bad ka BSC C&C JV, Gurugram, Haryana ruh ula shah jer kyrteng ha kane ka ejahar.
Ia kane ka case la register hapoh ka kyndon 120B, 409, 420, 465, 468, 471, 477(a) jong ka IPC bad hapoh ka kyndon 7, 8, 9, 13 (1) (c), (d) bad (e) pule lang bad ka kyndon 13(2) jong ka Prevention & Corruption Act, 1988.
Kat kum ka ejahar, u Chief Engineer ka Tnad PWD (National Highway) ula ong ba ula iohbor na ka Sorkar ban ujor ia ka ejahar pyrshah ia ki contractor/kompani bad ki nongmihkhmat jong ki nalor ki Engineer bad ki Ophisar ka tnad PWD (Natonal Highway).
Ka ejahar ka ong ba ki jingshisha kila mih pyrthei ha ka mukotduma iakajia (arbitration case) bala tian bishar da ka Artitral Tribunal ba kynthup ia u Justice (Retd) VB Gupta, Judge barim ka Delhi High Court nalor u Arbitratir KK Jalan, IAS, Co-Artitrator Ravindra Kumar Srivastava, IAS, kaba la pynpaw ba ki don shibun ki jingleh bym hok bad don bun ki briew kiba la leh ia ka kam bymman na kane ka jingai contract ban shna ia kane ka surok.
Lah ban kdew hangne ba ka Ministry of Road Transport & Highway (MoRTH) ha u 2010, kala khot ia ka tender ban shna ia ka surok 2-Lane jong ka surok NH-44 Shillong-Nongstoin bad Nongstoin-Rongjeng-Tura. Ia kane ka tender la khot hapoh ka Special Road Development Programme-NE (SARDP-NE) jong ka Sorkar Pdeng.
Ka Tnad PWD ( National Highway) ka Jylla, ka dei kaba pyntrei ia kane ka project na ka bynta ka MoRTH.
U Chie Engineer ka PWD, Highway Meghalaya na ka bynta ka Sorkar Jylla, ula iasoi ia ka jingiateh kular bad ka contractor M/s BSC C&C kum ka Joint Venture myn ha ka 21 tarik Risaw 2011 ha ka mang tyngka ba T.1303,83,45,181.
Ia kane ka dor contract la pynthymmai na ka por sha ka por bad la pynkiew sha ka T.2366.77 klur bad ia kane ka contract la pyndep ha ka 15 tarik Nohprah 2017 kaba la iaid palat ia ka por bala buh nyngkong eh ban pyndep kaba dei ha ka 6 tarik Lber, 2014.
Ha kane ka ejahar la pyni ruh ba ki don bun ki khep kiba pyni ia ka jingiatreikam sopsop hapdeng ki contractor jong ki kompani shmet bad ki Engineer ka Tnad PWD (NH) kaba lam sha ka jingduhnong kaba khraw ia ka pisa u paidbah.
Kine ki jingduhnong jong ka pisa u paidbah kala wan ha ka dur jong ka jingthied ia ki tiar ai sngewbha, ka jingpyndih kyiad ba rem dor, ka jingthong pisa da ka contractor ia ki Engineer ka PWD, ia kiba ki jinglut jingsep baroh la kynthup lang ha ka jingkam jong ka contractor ha ka mukotduma arbitration na ka bynta ban siew da ka Sorkar Jylla.
Kine ki jingpynlut ki kynthup ia ka jingsiew ia ka pisa ban thied tiar ai sngewbha ia ki Heh Ophisar ka Sorkar, ka jingai pisa ban leit jingleit Shillong-Guwahati da ki heh ka IOCL, ka jingai pisa ban thied ia ki baje HELOIS-Titan sha ki bor Sorkar, ka jingsiew pisa sha ka Hotel Polo Tower na ka bynta ka jingrakhe ia ka Engineers Day ka Tnad PWD, ka jingsiew pisa ban thied kyiad (Black Dog) ia ki Heh Engineer, ka jingsiew pisa ban iabam sngewbha da ki Nongtrei PWD ha Bamboo Hut Restaurant ha ka jingai khublei khatduh ia kiba shongthait, ka jingsiew pisa ia ka bai bam ha City Hut Dhaba na ka bynta ki heh PWD, ka jingsiew pisa ban thied kyiad ia ki heh Ophisar, ka jingpynlut ban thied Mobile Tab (Samsung) ia ki Heh Ophisar ha ka por Khristmas bad kumjuh ruh ha ka jingrakhe ia u snem thymmai 2015, ka jingai pisa ba T.5 lak sha ka Nongkhnum We Care Society bala bthah da ki heh Sorkar bad kiwei kiwei.
Kine ki dei ki nuksa kiba la pyni shai kdar ba ki Ophisar/Engineer ki la ialeh sop sopbad ki contractor ym tang ha kaba thoh, shukor hynrei kila shim ruh ia ki sienjam ba bakla, kaba lam sha ka jingduhnong kaba khraw ia ka pisa u paidbah, ong ka ejahar.
