Shillong, Nohprah 27 : Ka Hynniewtrep Integrated Territorial Organization (HITO) hynne ka sngi ba-ar kala ujor da ka ejahar pyrshah ia u MP ka All India Trinamool Congress (AITC) bad Nongialam Cricket barim u Kirti Azad namar ka jingbein jingkhoh ia ka riam khasi tynrai.
Ha ka ejahar bala mudui hakhmat u Officer In-charge ka Sadar Police Station, u Education Secretary ka HITO Arnell Nongdhar ula ong ba jingthoh tweeter jong u Kirti Azad kam shym la pynrem ia u Myntri Rangbah Duh ka Ri hynrei kham kor eh ba u ibein bad niewpoh ia ka riam tynrai ka Jylla khamtam ka riam tynrai ki Khasi.
“Kane ka jingleh u Kirti Azad ka dei kaba pynbitar, kaba pynkulmar, jingbishar bym hok bad ia kane ym dei ban shu khein sting bad ka dei ka jingibein ia ka Jaidbynriew Khasi. Namar kata, nga kyrpad ban leh eiei pyrshah ia une u briew ba u ipoh ia ka deiriti jong ki nongshongshnong ka Jylla” ong u Ernell ha ka ejahar.
Ha kajuh ka por, ka HITO kala pynbna ruh ban pynlong ia ka jingiaid paidbah ba jai jai ha ka 30 tarik u Nohprah.
“Khang ban bat iala ka burom bad ka khana pateng bad ruh ban saitkhuid ialade na kum kine ki jingipoh, ka HITO kan pynlong ia ka jingiaid paidbah ba jai jai ha ka 30 tarik u Nohprah 2022, kaba dei ruh ka sngi kaba ngin kynmaw ia ka jingdap 160 snem jong u Khla Wait Woh Kiang Nongbah” ong u President ka HITO Bah Donbok Dkhar ha ka kyrwoh.
U pyntip ba kane ka jingiaid paidbah kan sdang na Motphran ha ka por 11 baje mynstep bad yn iaid lyngba ka GS Road bad ban ialum lang ha u Soso Tham Auditorium.
“La kyrpad ia ki nongwan iaid rally ba kin phong iala ki jong ki riam tynrai bad ban phong da ka jingsngew sarong khnang ba ka pyrthei kan iohi ia ka jingriewspah ka riam tynrai jong ngi ha kane ka sngi” ong u bah Donbok.
Ha kajuh ka por, ka HITO kala khot ia baroh ki nong Meghalaya kynthup ia ki Khun Khasi Khara bad ki Raiot (ki briew ba kha bad heh ha kane ka Ri khlem da khein Jaidbynriew) namar ki ruh ki dei kiba mihkhmat ia kane ka Ri ki Lyoh kat shaba ki don.
U Bah Donbok u ong ba ka HITO ka kwah ban ban jur ba namar kane kan dei ka jingiaid paidbah ba jai jai, kan ym don satia ka jingpynthut ia ka khaii ka pateng hapoh ka Nongbah bad la kyntu ia baroh ki dukan ba kin plie khlem kano kano ka jingsngew sheptieng.
