Gangtok, Risaw 8: U Myntri kam Pohiing ka Ri u Amit Shah, uba dang iaid iuhkjat ha kylleng ki Jylla ka thain Shatei Lam Mihngi, hynnin ka sngi thohdieng ula ong ba ha kine ki 75 snem ba ioh laitluid ka Ri, ka thain Shatei Lam Mihngi ka dei kaba la niew tang kum ka jaka shangkai pyrthei bad kam ju don satia kano kano ka kam pynroi hangne shuwa ba u Myntri Rangbah Duh Narendra Modi un shah jied ban ialam ia ka Ri.
“Ha kine ki 75 snem ba ioh laitluid, shuwa ba u Narendra Modi un long u Myntri Rangbah, ka NE ka dei kaba la niew tang kum ka jaka shangkai pyrthei, kaba pawnam ha kiba bun ki jaka ba khring ia ki nongshangkai. Hynrei hadien ba ula long Myntri Rangbah, ki kam pynroi ba shisha kila sdang wan hapoh ka thain” ong u Amit Shah.
U Amit Shah ula kren ia kane ha ka Cooperative Dairy Conclave-2022 jong ka Eastern & North Eastern Region kaba la plie pyrda hynne ka sngi ha Gangtok.
U Amit Shah ula ban jur ba um shym la kam ia kine kiei kiei namar ki kam sain pyrthei hynrei ula kren ia ka jingshisha.
Haba kdew ia ka jingwan iuhkjat jong u ha NE ha u snem 2014, ula ong ba ula ju iuhkjat la bunsien ha Sikkim, Assam bad kiwei ki Jylla ka thain bad ula iohi ia ki kam pynroi ba ki mih bad u lah ruh ban pynshisha ba ki kam pynroi ha ka thain kila sdang tad hadien ba ka BJP kala shimti ia ka bor ban synshar.
U Myntri kam Pohiing un pynlut por haduh lai sngi ha Sikkim bad un sa leit iashimbynta ruh ha ki katto katne ki prokram ban long ha Assam.
