Shillong, Rymphang 24: U Myntri Rangbah duh ka ri u Narendra Modi hynne ka sngi thohdieng ula ong, ba u iohi ba u Tiew Lotus ula phuh ha kylleng ki bynta jong ka jylla Meghalaya.
“Nga iohi ba ka BJP kala don ha kylleng ki bynta jong ka Meghalaya bad bun ki briew ki ong, ba u tiew Lotus yn sa phuh bha hynrei kila don pat ki briew kiba sngewsih bad kiba la shah kyntait ha ka ri, kiba pyrta ba “Modi yn sa tih iaka thliew tep” bad ki paidbah kin sa ai da kaba jubab kaba paka ia kum kitei ki briew kiba don iaka rukom pyrkhat bad ka rukom kren kaba sniew” ong u Modi haka jingialap elekshon ha Khyndailad.
Katei ka jingshah kren sniew u Modi, ka thew iaka seng Congress kaba pynlong iaka jingiakhih halor ka jingshah kem u nongialam jongka u Pawan Khera.
U Modi ula ong, ka jylla Meghalaya ka donkam iaka sorkar kaba buh shwa ia u paidbah hakhmat ym da ka sorkar kaba buh hakhmat eh shwa iala ka iing ka sem.
“U tiew Lotus udei uba don iaka jingiasyriem kum ka jingkhlain, jingsuk bad jingskhem jong ka Meghalaya” ong u Modi.
Ula ong haba u pyrkhat shaphang ka Meghalaya u ju kynmaw ia ki briew kiba donsap, bad iaka riti dustur tynrai jongka bad ula pynpaw iaka jingkmen ban iohi ba ki paidbah ki mih ban pyni iaka jingieid bad ban ai jingkyrshan.
“Ngan pynphai kylla ia kane ka jingieid bad jingkyrkhu da kaba sdang ia ki kam pynroi ha Meghalaya bad ban pynsted ia ki project kiba iadei bad ka imlang sahlang” la ong u Modi ia ki paidbah ka jylla.
Hashwa ba u Modi yn ialap elekshon naka bynta ka seng ha Khyndailad, daki hajar ngut ki paidbah kila mih ban wan sngap ia ka jingkren une u nongialam ka seng BJP.
Mar ia poi ha nongbah Shillong, u Narendra Modi ula leit ban leh burom ia ki khla wait ka jylla kiba kynthup ia u Kiang Nangbah, u Tirot Sing Syiem bad u Pa Togan Sangma da kaba buh syntiew ha u Motsahnam uba don ha State Central Library.
Hadien kane u Modi ula shong da ka kali ban iashimbynta ha ka Road Show ban leit sha Khyndailad bad katba ka kali ka jong u ka dang iaid, la pdiang sngewbha ia u da ki paidbah ka jylla.
