Shillong, Nailur 11: Ka South Garo Hills District Cricket Association bad ka Shillong Cricket Association hynne ka sngi Nyngkong kila ioh ia ka jingjop haka jingialehkai jong ka Meghalaya Cricket Association’s U-19 Girls Inter District Cricket Tournament.
Ka Jayshree Singh kala kamai 105 not out na ka 123 Ball bad kane kala pynlong iaka SCA ban pylliem iaka West Jaintia Hills DCA da149 runs ha Umbuda, Ri-Bhoi haka thup Zone 1’s Group B, katba ka SGH kala jop da 8-wicket pyrshah iaka North Garo Hills DCA ha Salpara jong ka Zone 2.
Khlem ka Jayshree, ka SCA kan nym lah ban kamai run kham bun namar wat ka nongtied kaba bud iaka, ka lah ban kamai tang 14 run.
Hadien ba wan tied ba lai hadien baka SCA kala jop iaka Toss, ka Jayshree kala tied haduh 17 tylli ki boundary bad kane kala pynlong iaka Shillong CA ban ioh 227/5 naka 29 over bad naka WJH ka Sawakahi Syngkon kala khur 2 wicket bad ai 44 Run, ka Yoolang Suting 1 wicket bad ai 39 run bad ka Doliza Lyngdoh kala ioh 1 wicket bad ai 49 run.
Haba beh iaka thong, ka WJH kala hap lut ki wicktet tang ha ka 78 Run naki 23.3 over ha kaba ka Mercia Able Dhar kala ioh kamai 11 Run katba ki nongkawang ball naka SCA, ka Natasha Rabha kala khur 4 wicket bad ai tang 20 run, ka Monica Singh ka khur 3 wicket bad ai tang 7 run bad ka Jennyfer Fancon kala khur 2 wickter bad ai tang 17 run.
Ha kawei pat ka jingiakhun ka NGH kala tied nyngkong bad ka kamai tang 66 run naki 25.2 over bad ki nong kawang ball ka SGH, ka Dianchidora N Sangma kala ioh 2 wicket bad ai tang 5 run bad ka Rikmanchi M Sangma kala khur 2 wicktet bad ai 7 run.
Haba beh iaka thong ka SGH kala khur jingjop tang hapoh ka 13.5 over hadien ba ki nongtied ba kynthup ka Jaylynn R Marak kala ioh 11 not out, ka Janicka R Marak ruh 11 run bad ki nong kawang ball ka NGH kata ka Jessica Marak kala ioh khur 1 wicket bad ai 14 run bad ka Chigame Marak kala ioh 1 wicket bad ai 18 run.
Haka 12 tarik ka jingialehkai kan long haka Zone 1’s Group A ka East Khasi Hills CA pyrshah iaka Ri-Bhoi DCA bad haka Zone 2, ka SGH pyrshah iaka East Garo Hills DCA.
