Shillong, Nailar 02: U Myntri Rangbah ka jylla u Conrad Sangma hynne ka sngi Thohdieng, ula ong ba kila tyrwa ban jied ia ki katto katne ki jaka kiba don ha ka thain shatei lammihngi kum ki ‘Special Climate Action Zone’, kiban iadei dur bad ki Special Economic Zone jong ka ri India.
“Kane ka sienjam ka thmu ban ai jingkyrshan bad subsidy na ka bynta ka jingpynmih ia ki mar kat kum ka aiom bad kymjuh tuh ia ki kynhun kiba sngewthuh ia ka jinglong ka suinbneng, ban kyntiew ia ki rukom treikam kiba lah ban neh. Ki jingangnud jong ngi shaphang ka jinglong ka suinbneng ha Meghalaya ka iaid palat ruh bad ka jingpynneh pynsah. Ngi iohi ba jingkylla ka suinbneng kum ka lad ban thaw ia ki rukom kamai kiba lah ban treikam” ong u Conrad Sangma ha ka Dissemination Workshop halor ka phang “Forest Survey & Mapping Using Hybrid System to Analyse Carbon Financing and Phyto-diversity Heat Map & Provisions of the BD Act (Amendment).
U Myntri Rangbah ula pyllait ruh ia ka kaiphod halor ka “Forest Survey & Mapping for Meghalaya Using Hybrid System to Analyze Carbon Financing and Phyto-diversity Heat Map”.
Ula ong, ka rukom treikam ba thymmai jong ka Meghalaya ka kynthup ia ka jingthaw ia ka jingkhein jingdiah ia ki marpoh khyndew ki jongka bad ban bishar bniah iaka ioh ka kot jong ki jingshakri kiba iadei bad ka mariang. “Kane ka rukom kan iarap ban pynmih ia ki pisa bad ban pyrshang ban pynneh pynsah, ban seng ia ka rukom kamai kaba thymmai bad ka jingpynneh pynsah ia ka mariang bad ka jingtreikam ha kaba iadei bad ka jinglong jongka suinbneng bad kiwei kiwei”.
Ula ong ba ka rai jong ka jylla ban iasoh bad ka Global Under2 Coalition ka dei ka sienjam kaba kongsan ha ka jingpyrshang ban pynduna ia ka jingktah jong ka jingkylla ka suinbneng bad ban kyntiew ia ka roi ka par. Ka kynhun Under2, ka dei ka kynhun kaba la thmu ban pynurlong ïa ka jingpynmih ia ka lyer kaba khuid haduh u snem 2050.
Ula pynbna ba ka jylla Meghalaya ka dei ka jylla kaba hynriew ban iasoh bad ka Under2 Coalition. “Ka Meghalaya, kaba dei ka bynta jong ka Indo-Burma, ka long kaba kongsan bha na ka bynta ban pynneh pynsah, kaba trei kum ka jaka pynlang carbon kaba kongsan ha ryngkat bad ka Arunachal Pradesh” u la ong.
Ka Biological Diversity Act, 2002, kaba la thaw da ka Parliament ka ri India, ka long kum ka nongrim na ka bynta kane ka mishon, kaba thmu ban pynneh pynsah ia ki jingthaw ba im, ban pynthikna ia ka jingpyndonkam kaba neh, bad ban kyntiew ia ka jingsam mar katjuh ia ki jingmyntoi kiba la ioh na ki marpoh khyndew bad ki jingtip tynrai.
Ka jingpynkylla kaba dang shen ia ka ain Biological Diversity Act kala nang pynkhlain shuh shuh ia ka rukom pyniaid bad ka jingiashim bynta jong ki nongshong shnong ha ka thain.
Ki mat kiba kongsan jong kane ka jingpynkylla, ki kynthup ia ki rukom ai jingmynjur kiba pynbeit ryntih na ka bynta ban ioh ia ki marpoh khyndew, ki rukom wadbniah bad jingpynroi kiba pynsuk, bad ki lad ki lynti kiba pynskhem na ka bynta ban iasam jingmyntoi bad ki nongshong shnong bad ki trai ri trai muluk. Kine ki jingkylla ki thmu ban kyntiew ia ka jingpyndonkam kaba neh bad kaba kynthup lang ia ki jingthaw ba im katba ki ai ia ka jingshai kaba kham bha ha ka liang ka ain bad ka jingpynsuk ban bud ryntih.
“Ha Meghalaya, kine ki kyndon ki long kiba kongsan bha haba ka jylla ka don ia ki jingthung jingtep kiba kyrpang, kiba don ïa ka dor kaba khraw ha ka liang ka mariang, ka kolshor, bad ka ioh ka kot. Ka jingpyntreikam ïa ka aiñ kan ïarap ban ïada ïa kine na ka jingshah pyndonkam bakla bad kan pynthikna ba ki nongshong shnong kin ïoh jingmyntoi na ka jingpyndonkam ïa ki ha ka rukom kaba neh. La thaw ia ki 6,484 tylli ki Biodiversity Management Committee (BMC) ha kylleng ki shnong ki thaw kiba don ha nongkyndong bad ha sor da ka jingthmu ban pynkupbor ia ki bor pyniaid shnong” ula ong.
“Kine ki komiti ki don ka bynta kaba kongsan ha kaba buh ia ki jingthoh ïa ki jingdon jingem ka mariang bad ki jingtip tynrai, ban pynsuk ïa ki jingïateh kular ban ïoh bad ban ïasam jingmyntoi bad ban pynroi ïa ki jingthmu ban pynneh pynsah ia ki khlaw ki btap. Ka jingpynkylla jong ia ka ain jongu snem 2023 ka ai bor shuh shuh ïa kine ki komiti, ban pynthikna ba ki bor shnong kin pynsngew iaka sur bad ki jingthrang ka jongki khnang ba yn lah ban shim ia ki rai kiba kongsan” ula bynrap.
