Guwahati, Jymmang 01: U Myntri Rangbah (CM) ka Assam u Himanta Biswa Sarma hynnin ka sngi U Blei u la pyntip ba ka tnat pulit ka la tyrwa shongthait mon sngewbha ia kumba 300 ngut ki heh pulit ia kiba la shim ba ki dei kiba kyrni ha ka jingdih kyiad.
Haba kren sha ki lad pathai khubor u CM Himanta Biswa Sarma u la pynshai ba ka jingkyrni ha ka jingdih kyiad ka ktah jur ia ki met ki phad bad ka koit ka khiah ka jong ki bad na ka liang ka sorkar ka don ia ki kyndon kiba tyrwa na ka bynta ban shongthait noh da ka mon sngewbha ne Voluntary Retirement Scheme (VRS) na ka bynta jong ki.
Na ka liang u Sarma u la pynpaw ba ka jingpyntreikam ia ka VRS ka dei kaba la dep lypa ban pyntreikam sha kiwei pat ki jaka, hynrei kane ka dei ka sien kaba nyngkong ia kaba yn pyntreikam ha Assam.
Kine ki pulit kiban shongthait noh da ka mon sngewbha kin ioh pdiang beit ia ka tulop kaba pura jong ki, hynrei yn bujli noh ha ki jaka jong ki da kiwei pat ki dkhot kiba thymmai, ong u Himanta Sarma.
“Kito kiba la kyrni ha ka jingdih kyiad, kiba la sngaid palat pud, bad kito kiba la ngat ha ki jingshah kynnoh donkti ha ki kam bamsap kin ioh ia kane ka VRS lane ka jingiarap ba la tip kum ka CRS,” ong shuh shuh u CM ka Assam.
