Shillong, Nailar 23: Ka All India Trinamool Congress (TMC) kala rai ban pynieng ia ka MDC ba marwei ka GHADC kum ka kyrtong ha ka elekshon shiteng samoi jong ka Gambegre Constituency.
Ha kajuh ka por, u Nongialam ka TMC bad Myntri Rangbah barim Dr Mukul Sangma ula kynnoh ba ka National People’s Party (NPP) kala pyndonkam bakla ia ki bor Sorkar ban jop ia kane ka elekshon.
Haba iakren bad ki nongthoh khubor ha ka sngi Thohdieng, u Dr Mukul ula pyntip ba u President ka Pradesh Trinamool Congress Committee Bah Charles Pyngrope bad kiwei ki dkhot ka Election Committee kila dep shong bad iakren ia ki aplikeshon jong ka MDC ka party ka Dengnakpara Sadhiarani M Sangma, kaba dei ka kurim u para bad MLA barim ka Rangsakona Zenith M Sangma.
“Ka Committee kala iatylli kawei ha ka rai ban phah ia ka kyrteng ka Sadhiarani ban ioh ia ka jingmynjur kum ka kyrtong ka TMC ha kane ka elekshon shiteng samoi ban wan ha Gambegre. Mynta ngin ap ia ka jingmynjur jong ka Chairperson bad yn sa pynbna shen ia ka kyrtong” ula ong haba bynrap ba ka party kala treikam shaid shaid mynta ha ki shnong ki thaw ban jop ia kane ka seat.
Kane ka elekshon shiteng samoi ka dei kaba la pynlong hadien ka jingiehnohkam jong u MLA ka Congress Saleng A Sangma hadien ba ula shah jied kum u MP ka Lok Sabha na Tura.
Une u Myntri Rangbah ka Jylla ula kynnoh ia ka NPP ba kala pyndonkam bakla ia ki Nongtrei Sorkar bad kynnoh ba kala sam ia ki CGI sheet sha ki longiing hapoh ka constituency.
“Nga la buddien bha ia ka jinglong jingman ha ka constituency. Kawei kaba khring eh ia nga ka dei ka jingiohi ba ka Sorkar kala bthah ia ki nongtrei Sorkar ba kin pynleit jingmut ha kane ka constituency” ula ong.
 kala rai ban pynieng ia ka MDC ba marwei ka GHADC kum ka kyrtong ha ka elekshon shiteng samoi jong ka Gambegre Constituency.){kind=link}