Guwahati, Nailar 07 : Ka Iingkashari Supreme Court ha ka sngi Nyngkong, kala tyrwa ia ka Committee jong ki laingut ki Judge bala shongthait jong ki High Court, ka ban tohkit bad khmih ruh ia ki lad ai jingiarap nalor kiwei kiwei ki kam sha ki briew ba shah ktah na ki kam iaumsnam hapoh ka Jylla Manipur.
Kane ka Committee ka kynthup iau Justice Gita Mittal ( Chief Justice barim ka J&K HC), Justice Shalini Joshi (Judge barim ka Bombay High Court), bad Justice Asha Menon (judge barim ka Delhi High Court).
“Ka jingpyrshang jong ngi ka long ban wanrah pat ia ka jingsngew shaniah ia ka lynti jong ka ain. Ngin sa thaw ia kawei ka Committee ki lai ngut ki Judge barim ka ban khmih ia ki kam nalor ka jingtohkit kynthup ruh ki jingiarap, ki sienjam ban tem ia ka jingiakynad bad kiwei kiwei” ong ka Iingkashari.
“Kin sa 5 ngut ki Ophisar ha ka kyrdan DySP, ki ban wanrah sha ka CBI na ki Jylla bapher bapher. Kine ki Ophisar kin treikam ruh hapoh ki saw kynroh bad rukom treikam jong ka CBI” kala ong.
U Director General of Police ka Manipur Rajiv Singh ula iadonlang hapoh ka Iingkashari haba shong bishar ia kane ka kam da ka kashari bala khlieh hi da u Chief Justice DY Chandrachud, ban jubab ia ki jingkylli halor ka thma iapher jaidbynriew bad ki sienjam bala shimda ki bor Sorkar haduh mynta nalor kiwei kiwei.
Pule ruh: Manipur : Iakhih ki Kynthei Meitei pyrshah ia ki shipai Assam Rifles
