Shillong, Iaiong 23 : U Vice President ka BJP bad MDC ka Tura Bernard N Marak hynne ka sngi U Blei ula pyntip ba ka BJP kala tyrwa ban shna ia ka Secretariat bad thymmai ha Tura na ka bynta ban pynlong ia ka Dorbar Tlang.
Ha ka kyrwoh, u Bernard ula ong ba ki paidbah kila apkhmih lynti ban ioh ia ka Winter Capital ha Tura. Ka Winter Capital kan sa urlong hadien ba ka Secretariat bad kiwei ki headquarter jong ki Tnad bapher bapher kin don ha Tura.
Ula ong ba shuwa ka elekshon, ka BJP ka sngewthuh ia ka jingkwah jong ki paidbah bad ka jingkong san ban don ia ka Secretariat ha Tura.
Kat kum ka jingong jong u, ka BJP kala iohi ia ka Winter Capital ha Tura na kawer pat ka liang kaba don jingmut bad khnang ba kane ka urlong shisha, dei ban buh shuwa hakhmat ia ki jingdonkam ha kaban don ia ki jingtei/Ophis.
“Namar kata, ka BJP kala tyra ban shna ia ka Secretariat ba thymmai ha Tura ban ioh ia ka Dorbar Tlang. Ka Sorkar Pdeng kala mynjur ia ka Secretariat ba thymmai hynrei ia ka jingtyrwa ka dei ban phah da ka Sorkar Jylla” ong u Bernard.
“Ban pynurlong ia ka Winter Capital, u Myntri Rangbah Conrad K Sangma bad ka Kynhun Myntri ki don ia ka bynta kaba khraw bha ban leh kata da kaba pynbna bad mynjur ia ka Tura kum ka Winter Capital kaba nga ngeit ba un sa rah iakren shen ha ka Kynhun Myntri” ula bynrap.
Ha kajuh ka por, ka BJP kala iaroh ia ki Kynhun bapher bapher ka Thain kiba la mih ban dawa ia ka Winter Capital, kaba la kyrshan ruh da u Myntri Rangbah Conrad Sangma bad u MLA Saleng Sangma.
