Shillong, K’lyngkot 14 : Ka jingsangeh treikam jong ki palat 7000 ngut ki nongtrei ASHA pyrshah ia ka jingslem ban ioh ia ki bainong ka dang iai bteng haduh mynta bad u Myntri ka Koit ka Khiah Bah Wailadmiki Shylla ula kular ba ka Sorkar kan shimkhia ia kane ka kam.
“Ka don katto katne ka jingeh hangne namar ka pisa ka dei kaba wan na ka Sorkar Pdeng. Ngi la tynruh ban pyllait noh ia kane ka pisa kham kloi kat kaba lah” ong u Bah Wailad haba iakren bad ki nongthoh khubor ha ka sngi Balang.
U Myntri ula dep ban iakren ia kane ka kam bad u Misson Director ka NHM, uba la kular ia ki nongtrei ASHA ba un sa pyntip ia kaei kaba jia. “Kam pat wan sha ka jingtip jong nga ba kin dang bteng ia ka jingsangeh treikam, hynrei ngi la tynruh ban pyllait noh ia kane ka pisa” bynrap u Bah Wailad.
Ki Nongtrei ASHA kila sangeh treikam mynta la hynniew sngi, haba dawa ban pynlait noh ia ka bainong jong ki kam ba ki trei tam.
