Kyntu u Conrad ban pynkiew 25% ka bhah khajna sha ki Jylla barit ka NE
Shillong, Naitung 07 : Ki Nongialam na ki saw tylli ki Jylla ka Thain Shatei Lam Mihngi- Meghalaya, Mizoram, Tripura bad Sikkim, kila iakynduh ia ka 16th Finance Commission ha New Delhi bad buh lang hakhmat ia ki jingdawa ba iadei bad ka jingai song pisa.
Ia kane ka jingialang la pyniaid da u Myntri Rangbah ka Meghalaya Conrad K Sangma bad iashimbynta da u Myntri Rangbah ka Mizoram Lalduhoma, Myntri pla tyngka ka Tripura Pranajit Singha Rou bad ki Heh Ophisar na Sikkim.
Kane ka kynhun kala ban jur ia ka bynta ba kongsan jong ki jingai jingmut ka Finance Commission haba pynshong nongrim ia ka bhah jong ki khajna ka Sorkar Pdeng ba ju ai sha baroh ki Jylla. Kila pynpaw ba kane ka jingkyrshan ka long kaba donkam bha na ka bynta ka jingkiew ka ioh ka kot ki Jylla barit ka thain Shatei Lam Mihngi, kiba bunsien ki ju iakynduh ia ki jingduna pisa.
Ha ka jingiakren, u Myntri Rangbah ka Jylla Meghalaya ula ban jur ba ka 16th Finance Commission kan ai jingmut ba la kumno kumno ruh ban pynkiew noh ia ka bhah khajna ki Jylla bar it ka thain Shatei Lam Mihngi sha ka 25% na kaei kaba ai da ka 15th Finance Commission bad ruh ia ka song pisa ba kyrpang ban tei ia ki jingtei ha kine ki Jylla.
Kane ka jingdawa bala iamynjur lang da baroh saw tylli ki Jylla kala ioh ia ka jingkyrshan da kawei ka sur na baroh ki Jylla kiba la iashimbynta ha ka jingialang.
U Chairman bad ki Dkhot ka 16th Finance Commission kila ai ia ka jubab kaba sngewtynnad, haba kubur ia ki jingeh ba kham pher bad ka jingkiew ka ioh ka kot ha kine ki Jylla barit ka thain Shateii Lam Mihngi ha kane ka Commission ba dang iaid mynta (15th Finance Commission).
La pynpaw ba ka jingpynkiew ba 20% ia ka jingsam bhah khajna na ka 14th sha ka 15th Finance Commission kala lam sha ka jingkiew ba 100% ha ka jingpynlut pisa (capital expenditure). Kane ka jingpynlut kala iarap bha ban pynjanai ha ki kam ba iadei bad ka koit ka khiah, ki kam jngohkai bad ki jingtei bapher bapher hapoh ka thain.
Ban pynneh kumjuh ia kane ka jingkiew ki Jylla, ka kynhun kala kynty ia ka Commission ba kan ai jingmut noh ha kaban pynkiew 25% ia ka bhah khajna sha ki Jylla barit jong ka thain Shatei Lam Mihngi. Kila tyrwa ruh ban pynkha iaka Special Infrastructure Fund (song pisa ba kyrpang ia ki jingtei) ban lah pynurlong ia ki jingdonkam ka roi ka par ba kham pher ha ka thain. Kane ka jingtyrwa kala ioh ia ka jingkyrshan na baroh saw tylli ki Jylla.
Ka 16th Finance Commission, bala ialam da u Dr Arvind Panagariya, kala kubur ia ki jingeh bad ka jingkiew ha ka thain. Ki saw Jylla kila aiti ruh ia ka dorkhas ba kdew ia ki jingeh bad ki jingangnud jong ki Jylla ha kane ka jingialang.
Ka jingialang, kaba la pynbeit da ka Tnad Finance ka Jylla Meghalaya, kala kut hapdeng ka jingkyrmen, ha kaba baroh ki nongiashimbynta kila pynpaw ia ka jingkyrmen ban iohi ia ki jingai jingmut kiba bha, ki ban kyrshan ia ka jingbteng ka roi ka par jong ka thain Shatei Lam Mihngi.
