Tynruh ka NPP ban iasyllok halor ka FCRA | Pynkhlain ia ka jingpynleit jingmut ha NE ha ka AGM

Kwah u Conrad ia ka synshar khadar ba buh hakhmat ia u paidbah

Shillong, Jylliew 09 : Ka National People’s Party (NPP), hapoh ka jingialam u National President Conrad K Sangma, kala pynlong ia ka jingialangjong ka National Committee bad ka Annual General Meeting (AGM) ha Orchid Resort, Mawkasiang, New Shillong Township ha ka sngi Nyngkong (8 Jylliew).

Ka jingialang jong ka National Committee, ka shnat treikam ba halor duh ha ka kam shim rai jong ka party, la iashimbynta da ki nongialam kiba la rangbah, ki nongkitkam, ki MLA na Meghalaya, Manipur bad Nagaland. Ka jingiakren bala pynleit jingmut bha ka long halor ka lynti iaid ha ka sain pyrthei, ka jingpynkhlain ia ka seng, bad ki buit iakhun ia ki elekshon ban wan ha kylleng ki Jylla ka thain Shatei Lam Mihngi bad shabar.

Ha ka jingialang ka AGM, ka party kala shim ia katto katne ki rai kiba thmu ban pynkhlain ia ka jingiashimbynta ha ka synshar khadar paidbah, ban kyntiew ia ka jingsuk bad ka jingiasuk ha NE, iada ka hok ki trai muluk bad pynsted ia ka roi ka par ba kdup lang ia baroh hapoh ka thong jong ka “Northeast 2047: Gateway to Prosperity”.

Ka mat ba kongsan jong ka AGMka long ka jingshim rai ban wanrah ia ka jingtreikam kaba shai, ka jingtrei da kaba buh ia ka por, bad ka jingiasyllok halor ka FCRA, pynbiang tarajur ia ki jingsngewkhia halor ka jingshngain kaRi bad ka jingdonkam ban pynlaj ia ki seng trei mon sngewbha ba kin shakri khambha ia ka imlang sahlang, khamtam ha ki thain ki ba shah ieh.

Ka AGM ka pynskhem biang ruh ia ka jingkut jingmut jong ka party sha ka :
• Pynkhlain ia ka jinglong nongialam hapdeng ki samla bad ki kynthei
• Wanrah ia ka roi ka par kaba neh bad ba ioh lang mar katjuh
• Pynkhlain ia ka jingiatreilang hapdeng ki Jylla hapoh ka thain Shatei Lam Mihngi
• Pyniar ia ka ktem jong ka Party ha kylleng ka ri India da ka jingphaikhmat halor ka synshar khadar kaba don akor bad ba don jingkitkhlieh

U Conrad K Sangma, National President ka NPP ula ong, “Ka rai kaba shim mynta ka sngi ka pyni ia ka jingkut jingmut

jong ngi sha ka synshar khadar kaba buh nyngkong eh ia u paidbah. Man ki rai ba ngi shim ka dei ban ialam da kawei ka

nongrim, la kan ai jingmyntoi ne em ia ki paidbah. Kane ka dei ka nongrim jong ka thong bad ka jingkiew shaphrang
ka party.

Halor ka bynta jong ka thain Shatei Lam Mihngi ha ka jingkiew shaphrang ka Ri ha ka roi ka par, ula bynrap “Ka thain Shatei Lam Mihngi ka long kongsan bha na ka bynta ka lawei ka India. Da ki policy kiba dei bad ka roi ka par ba kynthup lang ia baroh, ka thain ka lah ban long kum ka khyrdop sha ka roi ka par bad ka jingkiew shaphrang na ka bynta ka ri baroh kawei”.

Haba kren ia ki jinglong jingman ka sain pyrthei mynta, ula kynthoh “Wat hapdeng ki jingeh, khamtam ha ki Jylla kum ka Manipur, ngi iohi ia ka kabu ban pynkhlain ia ka jingdon jong ngi ha ka Jylla. Ngi la aiti lut ban iatrei ha ki shnong ki thaw bad iakren bad ki paidbah ban wanrah ia ka jingjai jai, ka roi ka par bad ka jingmihkhmat”.

Halor ka jingkiew shaphrang ka Party, ula ong “Ka jingnang kiew ka jingiashimbynta na ki Jylla ha kylleng ka Ri ka pyni ia ka jingnang kiew ka jingshaniah ki briew ha ka NPP. Ngi sngew skhem ban pyniar ia ki dienjat jong ngi shabar jong ka thain Shatei Lam Mihngi ha ki snem ban wan”.

Ka party kala shong bishar ruh ia ki jingpynkhreh ia ki elekshon bad ki jingiakren kam sain hima sima ki ban wan kynthup:

• Ka elekshon shiteng samoi ka Lok Sabha ha Meghalaya, kaba ka NPP kala pynieng ia u kyrtong uba khlain.
• Ka elekshon kaba la khmih lynti ban long jong ka Garo Hills Autonomous District Council
• Ka jingpynkhreh ia ka elekshon Assembly ha Manipur, da ka jingpynleit jingmut ban pynkhlain ia ka jingrung khlieh ka party ha ki shnong ki thaw.

U National President ula ban jur ia ka jingdonkam ban pynbun ia ki jingiakren ha Manipur bad pynshlur ia ka jingleit iuhkjat man ka por da ki nongialam ka party ban pynkhlain ia ka seng bad aimynsiem ia ki nongkitkam.

Ka jingialang kala kut da ka kyntien ai khublei, kaba ithuh ia ka jingtrei shitom jong ki nongialam ka party, ki nongkitkam bad ki dkhot namar ka jinglah ban pynlong ia ka jingialang kaba jop bad noh synniang sha ka jingnang kiew suki pa suki jong ka party.

Haba pynskhem biang ia ka motto jong ka “One Voice, One Northeast.”, ka NPP ka pynpaw ia ka jingsngewskhem ha ka jingpynbteng ia ka lynti iaid ha ka roi ka par bad ka jingshakri ia ka Ri.

Kiwei pat ki mat ba iakren ha kane ka jingialang ki kynthup ia ka jingai jingbatai ba bniah halorka Uniform Civil Code da ka MLA bad National Secretary Dr Ampareen Lyngdoh. Ka jingai jingbatai halor ka jingphaidien biang ia ka Article 371 ha ka thain Shatei Lam Mihngi bala ai jingkren da u MLA ka Manipur M Rameshwar Singh.