Rakhe ka KSU ïa ka lyngkhuh sngi ïap ba 36 u Wickliffe Syiem
Nongstoiñ, Risaw 21: U President ka Khasi Students Union (KSU) samla Lambokstar Marngar, ula pyntip ba ka seng kala ioh jingtip ba ka Sorkar India kala pyrshang biang ban tynruh ha kaban ioh tih ia u marpoh khyndew Uranium na ka thain South West Khasi Hills District.
Une u Nongialam ba rangbah duh ka KSU ula pynpaw ia kane ha ka jingialang rakhe ia ka lyngkhuh sngi iap ba 36 snem jong u Paiem Wickliffe Syiem, Syiem khynnah ka Hima Nongstoiñ, kaba la pynlong da ka KSU-West Khasi Hills ha ka sngi Nyngkong.
Ki Nongialam ka KSU kila leit ban buh syntiew ha u mot sah kynmaw ba la tei pynsah nam ïa u Paiem, ha ka shnong Photjaud harud ka surok Nongstoiñ-Sohpian West Khasi Hills District.
Haba ai jingkren, u samla Lambokstar ula ong “D ha kine ki khyndiat sngi, ki don kiba la pynpaw ha nga ba dei ban peitngor bha, namar ka sorkar India kala ïaleh ban tynruh biang bad ban ïa sylla ha ka ban thied ïa ki briew, ban ïoh tih noh ïa u Uranium na Domïasiat bad na kiwei kiwei ki bynta ka Jylla”.
“Nga kwah ban kren shai ha kaba kum kane ka sngi ba ka sorkar India ka la dep ban thombor ha ka mynnor. Kam shym la sngap ïa ka jingud jingnam jong ki paidbah Hynñiewtrep ha kato ka por. Wat pyrshang ban hiar thma pat sa shisien ïa ka khyndew ka shyiap jong ka jaidbynriew”, ong u samla Lambokstar.
Haba ai jingkren u la kyntu ruh ïa ki samla bad ki dkhot ka seng KSU, da kaba ong ba kum ki dkhot ka jaidbynriew, ki dei ban long kiba tip briew tip blei, kiba ïai shah bad kiba len lade. Kum ki samla kim dei ban ailad ba kita ki bor nabar kin pynsngewthuh bakla ïa ka jingïaid lynti jong ki samla kiba trei shitrhem na ka bynta ka ri bad ka jaitbynriew.
U la ong ruh ba ki riew khraw kim ju ïap, hynrei ki ïai im na kawei ka pateng sha kawei pat bad u la kyntu ruh ïa ki dkhot ka KSU ba lada ki la mih na ka seng hynrei kim dei ban mih noh na ka nongrim ba skhem jong ka seng KSU.
Ha ka jingïalang kaba lyngkot ha utei u mot sah kynmaw, na ka liang jong ka Seng ka la pynlong ruh ïa ka jingsngap jar kaba 1 minit, kum ka daw ban kynmaw burom ïa utei u Syiem khynnah jong ka Hima Nongstoiñ.
Ïa ka jingïalang kaba lyngkot la pynïaid da u Samla Franklin Syiemïong General Secretary ka KSU WKHD bad kiba la iadon lang ki kynthup ia u u President ka KSU West Khasi Hills Bah John Fisher Nongsiang lem bad kiwei kiwei ki dkhot jong ka seng na kylleng ki jaka jong ka ri lum Khasi bad Jaiñtia.
 samla Lambokstar Marngar, ula pyntip ba ka seng kala ioh jingtip ba ka Sorkar India kala pyrshang biang ban tynruh ha kaban ioh tih ia u marpoh khyndew Uranium na ka thain South West Khasi Hills District.){kind=link}