Nongpoh, Risaw 05 : Arngut ki briew kila iap hashen bad uwei ula mynsaw jur haba ka kali ba ki shong, kaba dei ka kali Sorkar, kala shah tynrah ha ka trok ha ka miet sngi U Blei ha surok NH-06.
Kane ka jingjia kala jia ha ka por 8 baje eiei mynmiet ha Umsaw Nongkharai, Ri-Bhoi.
Kiba iap bad uba mynsaw, ki dei kiba shong ha ka kali Bolero ML01-7455 jong ka Tnad Sports & Youth Affairs.
Ki arngut kiba iap ki kyrteng u Sanbirth M Momin uba niah ia ka Bolero, bad u Smart Sangma. Uba mynsaw par u kyrteng u Nikash M Momin.
Kat kum ka khubor Pulit, kane ka Bolero ka dei kaba dang kiew na Ri-Bhoi ban wan sha Shillong katba ka trok ka dei kaba dang hiar na Shillong.
Ki Pulit ki iathuh ba ka aksiden ka long kaba la jubor bha haduh ba ka Bolero kala pra phum bad ka trok kala kylla bad thiah lyndang hapdeng surok.
Ka trok kaba tynrah ka dei kaba don u nombor ML05-L-4368. La iathuh ba u nongniah bad u nongbud jong kane ka trok ruh, kila mynsaw. Kine ki kyrteng u Anil Dorjee uba niah ia ka trok bad u Bibash Thapa.
Ki Pulit kila pynkit noh ia ki briew ba iap bad ia kiba mynsaw sha Civil Hospital, Nongpoh.
Ki iathuh ba kane ka trok kaba thylli, namar ka jingpynher sted palat u nongniah, kala ryngkoh na ka liang lajong sha kawei pat ka liang bad kala leit ban rat beit beit ia katei ka Bolero ba dang wan kiew arsut.
Ki Pulit kila register case halor kane ka jingjia bad ka jingtohkit mynta kala iaid shakhmat.
